Madridning «Real» klubi vingeri Rodrigo Goes 2026 yil oxirigacha maydonga qayta olmaydi. COPE ma’lumotiga ko‘ra, 25 yoshli futbolchining qaytishi 2027 yil boshiga kutilmoqda.
Rodrigo jiddiy jarohatdan keyingi uzoq muddatli reabilitatsiya jarayonini o‘tkazmoqda. Klub futbolchining qaytishini maksimal darajada ehtiyotkorlik bilan rejalashtirmoqda va qayta jarohatlanish xavfi minimal darajaga tushgandagina unga maydonga chiqishga ruxsat beriladi.
Braziliyalik futbolchining muammolari mart oyida boshlangan. Tibbiy tekshiruvlar natijasida uning o‘ng tizzasidagi oldingi xochsimon bog‘lam uzilgani va lateral menisk shikastlangani aniqlangan. Rodrigo 10 mart kuni operatsiya qilingan.
Dastlab uning tiklanish muddati 10-12 oy deb baholangan. Rodrigo va «Real» tibbiy shtabining asosiy maqsadi — reabilitatsiyani to‘liq yakunlash va futbolchining qaytishini tezlashtirmaslik.
Agar tiklanish jarayoni reja bo‘yicha davom etsa, Rodrigo 2026 yil oxirigacha «Real» safida o‘ynamaydi. Uning aniq qaytish sanasi reabilitatsiya jarayoniga bog‘liq.
Rodrigoning «Real» bilan amaldagi shartnomasi 2028 yil yozigacha mo‘ljallangan. Klub futbolchining jarohatdan keyingi qaytishidan so‘ng ham unga ishonishda davom etmoqda.
