Мадриднинг «Реал» клуби вингери Родриго Гоэс 2026 йил охиригача майдонга қайта олмайди. CОPE маълумотига кўра, 25 ёшли футболчининг қайтиши 2027 йил бошига кутилмоқда.
Родриго жиддий жароҳатдан кейинги узоқ муддатли реабилитация жараёнини ўтказмоқда. Клуб футболчининг қайтишини максимал даражада эҳтиёткорлик билан режалаштирмоқда ва қайта жароҳатланиш хавфи минимал даражага тушгандагина унга майдонга чиқишга рухсат берилади.
Бразилиялик футболчининг муаммолари март ойида бошланган. Тиббий текширувлар натижасида унинг ўнг тиззасидаги олдинги хочсимон боғлам узилгани ва латерал мениск шикастлангани аниқланган. Родриго 10 март куни операция қилинган.
Дастлаб унинг тикланиш муддати 10-12 ой деб баҳоланган. Родриго ва «Реал» тиббий штабининг асосий мақсади — реабилитацияни тўлиқ якунлаш ва футболчининг қайтишини тезлаштирмаслик.
Агар тикланиш жараёни режа бўйича давом этса, Родриго 2026 йил охиригача «Реал» сафида ўйнамайди. Унинг аниқ қайтиш санаси реабилитация жараёнига боғлиқ.
Родригонинг «Реал» билан амалдаги шартномаси 2028 йил ёзигача мўлжалланган. Клуб футболчининг жароҳатдан кейинги қайтишидан сўнг ҳам унга ишонишда давом этмоқда.
