«Roma» himoyachisi Uesli ham Angliya Premer-ligasi jamoalarining e’tiborini tortmoqda. Bu haqda Football Insider nashri xabar berdi.
Manbaga ko‘ra, braziliyalik 23 yoshli futbolchiga «Manchester Yunayted», «Arsenal» va «Nyukasl» qiziqish bildirmoqda.
Biroq transferning amalga oshishi moliyaviy masalalarga bog‘liq bo‘lishi mumkin. Xabarda ta’kidlanishicha, «Roma» o‘z himoyachisini taxminan 60 million yevroga baholamoqda. Bunday qiymat ehtimoliy xaridorlar uchun jiddiy moliyaviy majburiyatni anglatadi.
Uesli bu mavsumda barcha turnirlar doirasida sakkizta uchrashuvda ishtirok etib, bitta golli uzatma muallifi bo‘lgan. Braziliyalik futbolchining «Roma» bilan shartnomasi 2030-yil o‘rtalarigacha amal qiladi.
