«Arsenal» hujumchisi Gabriel Martinelli yozgi transfer oynasida jamoani tark etishi mumkin. Bu haqda jurnalist Ekrem Konur xabar berdi.
Manbaga ko'ra, London klubi 24 yoshli braziliyalik futbolchini sotishga tayyor. Uning transferiga jiddiy qiziqish bildirayotgan klublardan biri «Manchester Yunayted» bo'lib, «qizil iblislar» yaqin kunlarda rasmiy taklif bilan chiqishi kutilmoqda.
Martinelli 2019 yilda Braziliyaning «Ituano» klubidan 7 million yevro evaziga «Arsenal» safiga kelib qo'shilgan. Uning London klubi bilan amaldagi shartnomasi 2027 yil 30 iyungacha amal qiladi.
2025/26 yilgi mavsumda braziliyalik hujumchi barcha musobaqalarda 53 ta bahsda maydonga tushib, 11 ta gol va 7 ta assist qayd etdi. Transfermarkt portali futbolchining transfer qiymatini 45 million yevro deb baholamoqda.
Eslatib o'tamiz, «Manchester Yunayted» yozgi transfer oynasida hujum chizig'ini kuchaytirishni asosiy vazifalardan biri sifatida belgilagan.
Muxlislar bu yangilikni Telegram’da muhokama qilmoqda
Izohlar Telegram’da ochiladi