Bugun Superliganing 28-turi yakuniga yetdi. Soʻnggi qarama-qarshilik Samarqandda oʻtdi. Unda «Dinamo» uyida «Bunyodkor»ga 0:1 hisobida yutqazib qoʻydi. Oʻyindan soʻng mehmonlar bosh murabbiyi Ivan Boshkovich matbuot anjumanida ishtirok etdi.
— Juda qiyin oʻyin boʻldi. Nega? Chunki bu bahsning ahamiyati juda katta edi. Ruhiy jihatdan ham ogʻir uchrashuv boʻldi. Hamma bu oʻyin qanchalik muhimligini bilardi. Hatto men ham buni deyarli final sifatida qabul qilishimizni aytgandim. Agar bugun gʻalaba qozona olmasak, toʻgʻridan-toʻgʻri ligada qolish imkoniyatidan mahrum boʻlishimiz mumkin edi. Yaxshiyamki, bugun maqsadimizga erishdik. Barcha futbolchilar gʻalabaga ishondi, bor kuchini ishga soldi.
Menimcha, avvalgi ayrim oʻyinlarda bundan ham yaxshiroq harakat qilgandik, ammo natija biz kutgandek boʻlmagandi. Bu futbol, bunday holatlar uchrab turadi. Eng muhimi, bugun oxirigacha kurashdik, borimizni berdik. Raqib ham juda yaxshi oʻyin koʻrsatdi. Biz oʻz imkoniyatimizni kutdik va u keldi. Uchrashuv davomida bahsli vaziyatlar ham boʻldi. Nazarimda, bugungi gʻalabaga munosib edik. Endi keyingi oʻyinga tayyorgarlik koʻramiz. Hozircha oldindagi bahs haqida oʻylashimiz kerak. Futbolchilarim ham bugungi oʻyindan toʻliq qoniqmagan boʻlishi mumkin, ammo natija muhim.
- Abdunabiyev maydonga tushganidan keyin u bilan ancha vaqt gaplashdingiz. Unga qandaydir koʻrsatmalar berdingizmi? Uning gol urishi oldindan rejalashtirilgan harakatmidi yoki vaziyatdan kelib chiqib qaror qabul qildimi?
— Albatta, u maydonga tushganidan keyin ayrim koʻrsatmalar berdim. Uning oʻz imkoniyatlari va fazilatlari bor. Bugun ham shu sifatlarini namoyon eta oldi. U tajribali futbolchi sifatida jamoa masʼuliyatini oʻz zimmasiga olishi kerak. Avval ham zaxiradan maydonga tushib, jamoaga yordam bergan holatlari boʻlgan. Bugun yana shunday boʻldi. Undan buni kutgandik.
Jamoangizdagi ayrim futbolchilarning oʻyini va harakatlarini hisobga olsak, bugungi uchrashuvda jamoa energiyasini oxirigacha saqlab qolish muhim edi. Bu borada nafaqat Abdunabiyev, balki barcha futbolchilarni alohida taʼkidlash kerak. Har bir futbolchi oʻz vazifasini bajardi. Bizga aynan shunday gʻayrat va energiya kerak edi. Oʻyin oxirigacha shu surʼatni saqlab qolishga harakat qildik. Eng muhimi, natijaga erishdik. Umid qilamanki, bu gʻalaba bizga keyingi oʻyinlarda ham ishonch bagʻishlaydi.
- Birinchi savolim oʻyindan tashqari masalaga oid. Sunʼiy ofsayd chizigʻi bilan ishlashga qancha vaqt ajratasiz?
— Rostini aytsam, bu borada maxsus mashgʻulotlar oʻtkazmaganman. Ammo doimo futbolchilarga raqibning himoya chizigʻi ortiga uzatiladigan toʻplarga tayyor turish kerakligini tushuntiraman. Bunday vaziyatlarda ofsaydga tushib qolmaslik juda muhim.
Buning uchun vaqt kerak. Ayniqsa, yosh va birga koʻp oʻynamagan futbolchilardan tashkil topgan jamoada bu jihatni shakllantirish oson emas. Oʻzbekistonda ham bunday yuqori saviyada oʻynaydigan jamoalar koʻp emas, deb oʻylayman. Bunday taktikani oʻzlashtirish uchun vaqt va oʻzaro tushunish kerak.
- Bugun uchta gol ofsayd sabab bekor qilindi. Umuman, oʻyinda ofsayd holatlari koʻp boʻldi.
- Shunday vaziyatlar kuzatildi, raqibda ham. Bu futbolning bir qismi.
- Dastlabki koʻrsatma raqib maydonida oʻynash, tashabbusni qoʻlga olish va hujumkor futbol namoyish etish boʻlganmidi yoki Kubok bahsi ekanini hisobga olib, ehtiyotkorroq harakat qilish rejalashtirilganmidi?
— Biz doimo raqib maydonida oʻynashga, tashabbusni qoʻlga olishga va hujum qilishga harakat qilamiz. Ammo raqib ham oʻz oʻyinini koʻrsatdi. Ular texnikasi yaxshi, juda yaxshi harakat qiladigan jamoa.
Natijaning ahamiyati katta boʻlgani uchun futbolchilarimizda ham maʼlum darajada ruhiy bosim boʻlgan boʻlishi mumkin. Bugun biz avvalgi oʻyinlardagidek erkin harakat qila olmadik. Shunga qaramay, oʻz futbolimizni koʻrsatishga intildik. Raqib ham bizning rejalarimizni amalga oshirishimizga imkon bermadi. Bu ham ularning yaxshi oʻynaganidan dalolat.
- «Dinamo» bugun juda yaxshi oʻyin koʻrsatdi. Ayniqsa, hujumchilarida bir qator imkoniyatlar boʻldi. Ammo ulardan toʻliq foydalana olishmadi. Raqib himoyasidagi boʻshliqlardan ham samarali foydalanish mumkin edi. Bu borada qanday fikrdasiz?
— Albatta, jamoa himoyada juda yuqori chiziqda oʻynasa, uning ortida maʼlum boʻshliqlar paydo boʻladi. Bu esa raqib uchun imkoniyat yaratadi. Biz ham aynan shu vaziyatlardan foydalanishga harakat qildik.
Baʼzi holatlarda ikkiga bir, uchga ikki kabi ustunliklar yuzaga keldi. Lekin bunday vaziyatlarda toʻgʻri qaror qabul qilish oson emas. Ayniqsa, yuqori saviyadagi markaziy himoyachilarga qarshi oʻynaganda bu yanada qiyinlashadi.
Siz aytgan fikrga qoʻshilaman. Men ham jamoamdan bunday vaziyatlardan maksimal darajada foydalanishni kutaman. Avvalgi oʻyinlarda ham shunga oʻxshash holatlar boʻlgan, ammo ulardan yetarlicha samara chiqara olmaganmiz.
- Raqibning oʻyinini yuqori baholadingiz. Unda oʻz jamoangizning bugungi harakatlarini qanday baholaysiz? Oʻz futbolchilaringizning oʻyinidan qoniqdingizmi?
— Takrorlayman, baʼzan oʻyin aynan shunday kechishi mumkin. Bugun biz koʻproq xarakter, xohish va kurash evaziga natijaga erishdik. Har bir raqibning oʻziga xos oʻyin uslubi bor. Bugungi raqibimiz bizga oʻzimiz istagan futbolni namoyish etish imkonini bermadi. Yaxshi jamoa esa turli uslublarda oʻynay olishi kerak.
«Dinamo» bugun nafaqat texnik jihatdan, balki jismoniy tayyorgarlik, tezlik va qarshi hujumlarda ham oʻzini yaxshi koʻrsatdi. Ular bunday futbolni oʻynay olishini namoyish etdi. Biz ham vaziyatga moslashishimizga toʻgʻri keldi. Eng muhimi, bugun natijaga erishdik. Shuning uchun raqibga ham yaxshi oʻyin uchun rahmat aytaman», - deya Boshkovichning soʻzlarini keltiradi Tribuna.uz jurnalisti.