«Manchester Siti» sobiq bosh murabbiyi Xosep Gvardiola Saudiya Arabistoni milliy jamoasini boshqarish imkoniyatidan voz kechdi. Bu haqda taniqli italiyalik insayder Nikolo Skira xabar berdi.
Ma’lum qilinishicha, saudiyaliklar ispaniyalik mutaxassisni mamlakat milliy jamoasi bosh murabbiyligiga taklif qilgan. Biroq Gvardiola ushbu taklifni qabul qilmaslikka qaror qilgan.
Avvalroq murabbiyning agenti ham Pep Saudiya Arabistonidan kelib tushgan takliflarni rad etganini ma’lum qilgan edi. Lekin o‘shanda gap aynan qaysi klub yoki jamoa haqida ketayotgani oydinlashtirilmagan edi.
Endilikda Nikolo Skira ushbu takliflardan biri aynan Saudiya Arabistoni milliy jamoasidan bo‘lganini ma’lum qildi.
Shu tariqa, Gvardiolaning murabbiylik faoliyatini Saudiya Arabistonida davom ettirishi haqidagi ehtimoliy variantlardan biri amalga oshmaydigan bo‘ldi.
Hozircha ispaniyalik mutaxassis faoliyatini keyingi bosqichda qayerda davom ettirishi ma’lum emas. Shuningdek, Saudiya Arabistoni tomoni taklif qilgan shartnoma muddati va moliyaviy shartlar haqida ham ma’lumot berilmagan.