Gakpo uchun kurashga "Siti" ham qo'shildi, "Tottenhem" esa ikkinchi taklifni tayyorlamoqda

"Tottenhem" Kodi Gakpo transferi bo'yicha ishlarni davom ettirmoqda.

Soccernews ma'lumotlariga ko'ra, yaqinda London klubi niderlandiyalik vinger uchun 60 million funt sterling miqdorida rasmiy taklif bergan, ammo mersisaydliklar buni rad etgan. Shunga qaramay, "taqachilar" futbolchini qo'lga kiritish niyatidan qaytmagan va yangi taklif tayyorlamoqda. Jamoa bosh murabbiyi Roberto De Zerbi 27 yoshli vingerni jamoaga olib kelishni qat'iy talab qilmoqda.

"Qizillar" Gakponi faqat yangi taklif moliyaviy jihatdan ancha katta qiymatga ega bo'lgan taqdirdagina sotishlari mumkin. Bundan tashqari, klubning o'zi ham avval yana bir hujumkor futbolchi bilan shartnoma imzolashni xohlamoqda.

Ta'kidlanishicha, Kodi uchun kurashga "Manchester Siti" ham qo'shilgan. "Shaharliklar" futbolchining vakillariga o'z qiziqishlari haqida ma'lum qilgan, ammo hali "Liverpul" bilan bog'lanishmagan. Bu ma'lumotni Fabritsio Romano ham tasdiqladi.

Shu bilan birga, "Tottenhem"dan farqli o'laroq, "Siti" niderlandiyalik o'yinchini asosiy tarkibdan kafolatlangan o'ringa ega futbolchi sifatida ko'rmayapti. Uni tarkibni kuchaytirish va zaxira variantlarini ko'paytirish maqsadida sotib olishlari mumkin.