«Bavariya» rahbariyati markaziy himoyachi Kim Min Jae bilan uning klubdagi kelajagi yuzasidan muzokara oʻtkazishni rejalashtirmoqda. Bu haqda Sport Bild nashri xabar bermoqda.
Manbaga koʻra, yozda transferga nomzod sifatida koʻrilgan janubiy koreyalik futbolchining jamoadagi holati soʻnggi haftalarda sezilarli darajada yaxshilangan. Klub tez orada koreyalik futbolchi bilan uchrashib, uning kelajakdagi oʻrni va rejalarini muhokama qiladi. Himoyachi Vinsan Kompani qoʻl ostida yanada koʻproq oʻyin amaliyotiga ega boʻla boshlagani klub rahbariyatining unga nisbatan munosabatini oʻzgartirgan.
Hozircha boʻlajak uchrashuv yangi shartnoma imzolanishini anglatmaydi — tomonlar avvalo futbolchining klubdagi kelajagini muhokama qiladi.
Maʼlumot uchun, Min Jae «Bavariya»ga 2023-yil yozida «Napoli»dan kelib qoʻshilgan. Uning Myunxen klubi bilan amaldagi shartnomasi 2028-yil yozigacha moʻljallangan. Bu mavsumda barcha turnirlar doirasida 6 ta uchrashuvda maydonga tushgan.
