«Ювентус» клуби «ПСЖ» дарвозабони Люка Шевалени ўз сафига қўшиб олиш имкониятини ўрганмоқда. Бу ҳақда Footmercato нашри хабар берди.
Манбага кўра, франциялик посбонининг ўзи ҳозирча «ПСЖ»ни тарк этишни истамаяпти. У Париж клубида қолиб, асосий таркиб учун курашни давом эттириш ниятида.
Шевале ўтган йилнинг август ойида «Лилл»дан 50 миллион евро эвазига «ПСЖ»га кўчиб ўтган эди.
Шу билан бирга, Париж ҳам эҳтимолий ўзгаришларга тайёргарлик кўрмоқда. Агар Люка жамоани тарк этса, унинг ўрнига «Парма» ва Япония миллий жамоаси дарвозабони Зион Сузукини таклиф қилиш имкониятини кўриб чиқади.
