«Ювентус» Криштиану Роналдуга тўланиши керак бўлган маош юзасидан суд жараёнини давом эттирмоқчи. Турин клуби Италия Олий кассация судига апелляция шикояти билан мурожаат қилиб, футболчига 9,8 миллион евро тўлаш мажбуриятини юклаган қарорга эътироз билдирди. Бу ҳақда Football Italia хабар берди.
Низо беш йил аввал, португалиялик ҳужумчи «Ювентус»ни тарк этиб, «Манчестер Юнайтед»га қайтганидан кейин юзага келган. Иш коронавирус пандемияси даврида маошлар тўловини кечиктириш билан боғлиқ. ОАВ хабарларига кўра, клуб Роналдуга 19,5 миллион евро тўлаш мажбуриятини олган.
2024 йил апрел ойида арбитраж футболчига дастлаб талаб қилинган сумманинг тахминан ярмини тўлаш ҳақида қарор чиқарган. Шу билан бирга, судялар клуб футболчини атайлаб чалғитган деган хулосага келмаган. «Ювентус» қарор устидан шикоят қилган, бироқ 2026 йил январида суд бу мурожаатни рад этиб, дастлабки қарорни ўз кучида қолдирган.
Маълумот учун, «Ювентус» Италия Олий кассация судига янги мурожаат қилганини 2025/26 йилги мавсум учун молиявий ҳисоботида тасдиқлаган.
Эслатиб ўтамиз, иш бўйича навбатдаги суд мажлиси санаси ҳозирча белгиланмаган.
Мухлислар бу янгиликни Telegram’да муҳокама қилмоқда
Изоҳлар Telegram’да очилади