Туриннинг «Ювентус» ва «Милан» клублари «Бенфика» ҳужумчиси Вангелис Павлидиснинг ўйинларини кузатиб бормоқда. Бу ҳақда футбол трансферлари бўйича хабарлар бериб келаётган Экрем Конур ижтимоий тармоқларда маълум қилди.
Манба маълумотига кўра, Италия клублари 26 ёшли юнониялик ҳужумчи учун курашда «Барселона»га рақиб бўлиши мумкин. Каталонияликларнинг ҳам Павлидисга қизиқиш билдираётгани ҳақида аввалроқ хабарлар тарқалган эди.
«Бенфика» ўз тўпурари билан хайрлашишга тайёр бўлса, унинг трансферидан қарийб 100 млн евро ишлаб олишни истамоқда. Бундай талаб футболчига даъвогар клублар учун трансфер қийматини муҳим омилга айлантириши мумкин.
Маълумот учун, Павлидис ушбу мавсумда Португалия чемпионати доирасида еттита баҳсда майдонга тушиб, саккизта гол урди ва иккита голли узатмани амалга оширди.
