Улуғбек Бақоев: «Замонавий футболда ёш ёки ёши катта футболчи деган тушунчага урғу бермаслик керак»

Зоминда бўлиб ўтган «Сўғдиёна» ҳамда «Бухоро» (1:1) жамоалари ўртасидаги учрашувдан сўнг ташкил қилинган матбуот анжуманида мезбонлар бош мураббийи Улуғбек Бақоев ўз фикрлари билан ўртоқлашди.

— Биринчи бўлим, айтиш мумкинки, бироз зерикарли ўтди. Ўйинда кескинлик бор эди, аммо голли вазиятлар кўп бўлмади. Иккита вазиятни эслаш мумкин. Биринчисида аниқ имконият юзага келди, иккинчи ҳолатда эса тўп рақиб футболчисига тегиб, рикошетдан сўнг дарвозага кирмади.

Иккинчи бўлимда ўйин ўзгарди. «Бухоро» гол урганидан кейин биз ҳисобни тенглаштириш учун олдинга ташландик. Биз ҳам бир қатор алмаштиришларни амалга оширдик. Ўйлайманки, бугунги алмаштиришларимиз дуранг натижага эришишимизда ёрдам берди.

Бугунги кунда бир очко қўлга киритишимиз, очиғи, биз учун муваффақиятли натижа ҳисобланади.

- Ёш футболчилар Сардор Жамолов ва Шохруз Камолов ҳақида нима дея оласиз? Олдинги иккита ўйинда Жамолов гол урганди, бугун эса Камолов тўп киритди.

- Ҳозирги замонавий футболда ёш ёки катта ёшли футболчи деган тушунчага ортиқча урғу бериш керак эмас. Футболчининг ёши муҳим эмас, агар у лига савиясига мос бўлса, захирадан майдонга тушиб, жамоага фойда келтира олса, демак, унга ишониш мумкин.

Замонавий футболда футболчи ўз ўйини, хоҳиши ва ҳаракати билан жамоага ёрдам бера олса, унга барча эшиклар очиқ. Шу боис бугун майдонга тушиб, гол урган ёш футболчиларимиздан хурсандман. Бу унинг илк голи бўлди. Уни ҳам, бутун жамоамизни ҳам охиригача курашгани ва бор кучини ишга солгани учун табриклайман», - дея Бақоевнинг сўзларини келтиради Tribuna.uz мухбири.