Улуғбек Бақоев: «Ўйин ҳақида кўп гапиришни истамаган бўлардим»

«Сўғдиёна» жамоасининг 4 та ўйинлик ғалабали серияси якунига етди.

Суперлиганинг 19-турида жиззахликлар сафарда амалдаги чемпион – «Нефтчи»га қарши майдонга тушишди.

Ўйин тўлиқ мезбонларнинг устунлигида ўтди ва шунга яраша 3:0 ҳисобида ғалаба қозонишди. «Сўғдиёна» эса харчанд ҳаракат қилмасин рақиб дарвозасига йўл топа олмади. Қолаверса, улар иккинчи бўлимда бир футболчи кам бўлиб қолишди.

Ўйиндан сўнг «Сўғдиёна» устози Улуғбек Бақоев матбуот анжуманида қуйидагича фикр билдириб ўтди:

- Аввало, «Нефтчи»ни бугунги ғалаба билан табриклайман. Учрашув ҳақида эса кўп гапиришни истамаган бўлардим.

Фақат шуни айтмоқчиманки, иккинчи гол борасида кўпчиликнинг фикри қизиқ...

Рақиб футболчиси ўша паллада танаси билан дарвозабонимизнинг кўриш имконини чеклаб қўйди. Дастлаб гол инобатга олинмади, кейин эса ҳисобга олинди. Ҳайрон қоларли ҳолат!

Тўғриси, баҳсни яхши ўтказишни ва охиригача курашишни истагандик, лекин, афсус, мағлубиятга учрадик», - дея Бақоевнинг сўзларини келтиради Tribuna.uz мухбири.