Матета «Кристал Пэлас» билан шартномасини бекор қилиш бўйича FIFA'га мурожаат этди

«Кристал Пэлас» ҳужумчиси Жан-Филипп Матета шартномани бекор қилиш ва Лондон клубини тарк этишни истамоқда.

Франциялик 29 ёшли футболчининг «бургутлар» билан битими 2027 йил ёзига қадар амал қилади. BBC маълумотларига кўра, Жан-Филипп келишувнинг қолган 10 ойини бекор қилиш мақсадида FIFA'га мурожаат этган.

Матета 2022 йилда «Майнц»дан трансфер қилинганидан сўнг 4,5 йиллик шартнома имзолаган. Унда шартномани яна 12 ойга узайтириш имконияти ҳам мавжуд эди. «Кристал Пэлас» ушбу бандни 2024 йилда фаоллаштирган. Бироқ ҳужумчи битимнинг хоҳишга кўра узайтирилиши мумкин бўлган сўнгги йили бекор қилиниши керак, деб ҳисобламоқда.

Матетанинг иши Премер-лига қоидалари асосида мустақил трибуналда кўриб чиқилган. Ҳозирча расмий натижалар эълон қилинмаган. Аммо маълум бўлишича, шартнома ҳозирча ўз кучида қолмоқда.

Футболчи FIFA'га мурожаат қилди. Агар шартноманинг сўнгги йили ҳақиқий эмас деб топилса, Матета эркин агентга айланади.

Ўтган мавсумда форвард АПЛда 32 та ўйинда 12 та гол урган. Бу мавсумда эса у 1 та баҳсда майдонга тушди.