Эрик тен Ҳаг Криштиану Роналду «Манчестер Юнайтед»даги фаолияти давомида жамоа ва мураббийга панд берганини айтди. Нидерландиялик мутахассис бу ҳақда Тhe Athletic нашрига берган интервюсида сўз юритди. Журналист Фабрицио Романо унинг фикрларини келтирди.
«Криштиану Роналду жамоага ҳам, менга ҳам панд берди, чунки биз режаларимизни у билан бирга тузгандик. «Манчестер Юнайтед»га келишимдан олдин қандай мақсадларим борлигини тушунтириш учун Португалияга учиб бориб, у билан гаплашганман», — деди Тен Ҳаг.
Мутахассис португалиялик ҳужумчининг футбол тарихидаги ўрнини юқори баҳолашини ҳам таъкидлади. Бироқ мураббий сифатида у ҳиссиётларга эмас, вазиятни оқилона баҳолашга асосланган қарор қабул қилиши керак бўлганини билдирди.
«У тарихдаги энг буюк футболчилардан бири. Мен уни жуда ҳурмат қилардим. Аммо мураббий сифатида оқилона қарор қабул қилишим керак эди», — дея қўшимча қилди Тен Ҳаг.
Маълумот учун, Тен Ҳаг «Манчестер Юнайтед»ни 2022–2024 йилларда бошқарган. Роналду эса клубга 2021 йилда қайтиб, 2022 йил ноябрида жамоани тарк этган.
Эслатиб ўтамиз, Роналду ва Тен Ҳаг ўртасидаги келишмовчиликлар 2022 йилда кенг муҳокамаларга сабаб бўлган эди.
Мухлислар бу янгиликни Telegram’да муҳокама қилмоқда
Изоҳлар Telegram’да очилади