«Нюкасл»нинг собиқ ҳужумчиси Алан Ширер «Манчестер Юнайтед» бош мураббийи Майкл Кэррикнинг ўрнини муносиб эгаллаши мумкин бўлган мутахассислар ҳақида фикр билдирди. Унинг таъкидлашича, клубдаги муаммолар нафақат майдонда, балки ундан ташқарида ҳам кузатилмоқда.
«Менимча, майдонда ҳам, ундан ташқарида ҳам жиддий муаммолар бор. Клуб раҳбариятининг юқори даражасида содир бўлаётган воқеалар доимо жамоанинг майдондаги ўйинига таъсир қилишини аввал ҳам айтганман. Буни анчадан бери кўриб турибмиз.
Агар Кэррик истеъфога чиқарилса, Фабиан Ҳюрцелер унинг ўрнини яхши эгаллаши мумкин. Бироқ «Брайтон»да иш юритиш модели бутунлай бошқача. Эдди Ҳау номзодини ҳам кўриб чиқиш керак. Антонио Конте вариантини ҳам истисно қилмаган бўлардим.
Бу сизга ёқадими ёки йўқми, ўйинларда ғалаба қозона олмасангиз ва дунёдаги энг йирик клублардан бирида ишласангиз, шундай ҳолатлар юз беради. Буни қабул қилиш керак. Ишончим комилки, Кэррик ҳам буни тушунади. Шу сабабли Майклга зудлик билан натижа керак, акс ҳолда бошқа номзодларнинг исмлари унинг ўрнига боғланишда давом этади», — дея Ширернинг сўзларини ТEАМtalk келтирмоқда.
Эслатиб ўтамиз, Кэррикнинг келажаги борасида ҳозирча клуб томонидан расмий қарор эълон қилинмаган.
