Ўзбекистон Суперлигасининг 22-туридан ўрин олган «Навбаҳор» — «Динамо» учрашуви арафасида «лочинлар»нинг 25 ёшли ҳимоячиси Саидазамат Мирсаидов беллашув ҳақидаги фикрлари билан ўртоқлашди.
«Бўлажак рақиб борасида тўхталадиган бўлсам, «Динамо» «чақилмас ёнғоқ» бўлган жамоалардан бири.
Клубни мамлакатимизнинг таниқли ҳамда тажрибали мутахассисларидан бири бўлган Вадим Карленович Абрамов бошқармоқда ва унинг бошқарувида самарқандликлар бу мавсумда яхши натижаларни қайд этишмоқда.
Шу боис, пайшанба оқшомида ўтказиладиган ўйинда ҳам «арслонлар» жамоамизга муносиб қаршилик кўрсатишга интилишади ҳамда бўлажак беллашувнинг кескин курашлар остида ўтиши эҳтимоли юқори.
«Динамо» билан бўладиган ўйинда майдонга ғалаба иштиёқида тушиб, рақибни мағлубиятга учратиш, мухлисларнинг ишончларини оқлашга интиламиз.
Фақат бўлажак беллашувда ҳам ишқибозлар стадионни тўлдирган ҳолда жамоамизни муносиб тарзда қўллаб-қувватлаб, ғалабамизга мададкор бўлишади деган умиддаман», — деди Мирсаидов.
