Роналду: «Жезуш менга берган ваъдасини иккинчи марта бузди»

Криштиану Роналду Жорже Жезуш билан юзага келган можаро ҳақида ўз фикрларини давом эттириб, қуйидагиларни ёзиб қолдирди.

«Учрашув якунида мен фақат бир нарсани — жамоа ғалаба билан майдонни тарк этишини ва ёлғиз қолишни истадим. Шу сабабли мухлислар билан саломлашиш учун бормадим. Бу фақат менинг масъулиятимдаги хато эди ва бундай бўлмаслиги керак эди.

У ерда бизни жуда фаол қўллаб-қувватлаган португалиялик мухлислардан узр сўрайман. Барча мухлислардан кечирим сўрайман. Шунингдек, португалиялик бўлмаган, аммо мени кўриш учун у ерга борган ва эҳтимол, менинг ҳаракатимдан хафа бўлган инсонлардан ҳам узр сўрайман.

Орадан 48 соат ўтиб, мен, бош мураббий ва Симау Коутиниу ўртасида суҳбат бўлиб ўтди. Чунки август ойидаги музокараларимизда ҳам айнан у иштирок этган эди. Суҳбат жуда жиддий ва очиқ ўтди. Ҳеч қандай яшириш ёки мавзуни юмшатишга ҳаракат қилинмади.

Биз ушбу «масала»га нуқта қўйишнинг ягона йўли бор, деган фикрга келдик: мураббий менга шахсан айтган гапларини Симау Коутиниу олдида матбуот анжуманида ҳам очиқ айтиши керак эди.

Келишув оддий эди. Мураббий матбуот анжуманини айнан шу мавзу билан бошлаши ва ҳақиқатни айтиб, масалага нуқта қўйиши керак эди.

У мендан ҳеч қачон бирор дақиқа ўйнашни сўрамаганимни, йиғин учун режани айнан мураббийнинг ўзи таклиф қилганини, мени қиздиришга чиқариб, кейин майдонга туширмагани хато бўлганини айтиши керак эди. Шунингдек, бундай ҳолат яна такрорланса, у бу ишни қилмаслигини билдириши лозим эди.

Учрашув якунида мураббий мени қучоқлашишни сўради ва матбуот анжуманида менга айтган гапларини такрорлашини ваъда қилди. Шу тариқа бу масалага нуқта қўйилиши керак эди. Мен Данияга қарши учрашувда ўйнамаслигим, «Драгау»даги баҳсда эса майдонга тушишим керак эди.

Бу келишувларнинг барчаси Симау Коутиниу иштирокида амалга оширилган.

Шундан сўнг мураббийнинг илтимосига кўра, у, Симау ва Тиагу Кравейру ўртасида видеоконференция орқали учрашув бўлиб ўтди. Унда биз муҳокама қилган масалалар яна бир бор қисқача баён қилинди.

Шундан кейин қисқа ҳужжат тайёрланди. Мен уни шахсан тасдиқладим ва мураббийнинг ўзи сўрагани учун, унинг хабардорлиги билан ҳужжат мураббийга етказилди.

Аммо матбуот анжуманида юз берган воқеалар ҳаммага маълум. Унинг позицияси бизнинг аввалги учрашувимиздаги гапларга мутлақо ўхшамади.

Мен ўзимга нисбатан муносиб деб ҳисобламаган иборалар ва кескин муносабатни эшитдим. Унинг матбуот анжуманидаги «мен хоҳлайман, мен қила оламан ва мен буюраман» қабилидаги муносабати бир кун олдин ёпиқ суҳбатимизда умуман намоён бўлмаган эди.

Мен тасдиқлаган қайдларда қуйидагилар ёзилган эди:

1. «Менимча, Данияга қарши ўйин ҳақида гапиришдан олдин айрим жиҳатларга ойдинлик киритиш муҳим. Чунки бу ҳақиқат. Миллий жамоадаги ушбу мавсум учун Криштиану Роналдуга режани менинг ўзим таклиф қилганман. Бу узоқ ва жуда яхши суҳбат бўлган.

2. Мен унинг миллий жамоада қанчалик яшашини ва жамоани қанчалик севишини яхши биламан. Шунингдек, унинг дунё футболидаги, айниқса 24 йил давомида терма жамоага кўрсатган ижобий таъсири ва аҳамиятини ҳам яхши тушунаман.

3. Мен Криштиану Роналдуга таклиф қилган режа унинг томонидан қабул қилинган.

4. У ҳеч қачон менинг қарорларимга шубҳа қилмади. У ўзини намунавий, садоқатли ва профессионал тарзда тутди.

5. Норвегияга қарши учрашув мен унинг учун тузган режага кирмаган эди. Бироқ биринчи ўйиндан кейин унинг жисмоний жиҳатдан тикланганини ҳис қилдим ва ундан фойдаланишим мумкинлигини айтдим. Криштиану бунга рози бўлди.

6. Пеле ёки Марадона даражасидаги футболчини қиздиришга чиқариб, кейин майдонга туширмаганим — менинг хатом. Агар бугунги кунга қайтиш имконим бўлганида, бундай қилмаган бўлардим.

7. Бу мавзуга нуқта қўйиш учун айтаман: мен Криштианунинг терма жамоада бўлишини хоҳлайман. Нафақат бироз, балки жуда кўп хоҳлайман. Яхшиямки, у ҳам менга ишонади. У «Ан Насср»да ҳам менга ишонган, бу ерда ҳам ишонмоқда.

8. Мухлислар билан саломлашмагани ҳақида биз аллақачон гаплашдик. Терма жамоа сафида 230 дан ортиқ учрашув ўтказган футболчи мендан Португалияга бўлган муҳаббат ҳақида сабоқ олмайди. Бу ҳиссий ҳолат натижасида юзага келган бир лаҳза эди ва у ҳеч нарсани ўзгартирмайди. У мухлисларга энг кўп автограф беради, энг кўп селфига тушади ва уларга энг кўп меҳр кўрсатадиган футболчи. Мавжуд бўлмаган муаммоларни ўйлаб топишнинг ҳожати йўқ. Хурсанд бўлмаганимизда, баъзан ҳиссиётга берилиб реакция қиламиз. Бу ҳам шу эди, холос».

Роналдунинг таъкидлашича, ушбу қайдларнинг ҳеч бирида мураббийнинг ундан кечирим сўраши кераклиги ҳақида гап бўлмаган.

«Шу тариқа, бу Жезус менга берган ваъдасини иккинчи марта бузиши эди», — деди Роналду.