Роналду: «ЖЧ-2026дан кейин Португалия ҳалқига аталган мактуб таёрладим. Миллий жамоадан кетишга қарор қилгандим»

Криштиану Роналду Португалия миллий жамоасининг сўнгги йиғинида Жорже Жезус билан ўртасида юз берган воқеалар ҳақида шахсан баёнот берди.

«Ваъда қилганимдек, миллий жамоанинг сўнгги йиғинида юз берган воқеаларни шахсан ўз номимдан ва тўғридан-тўғри тушунтириб беришга қарор қилдим. 2026 йилги жаҳон чемпионатидан сўнг Португалия халқига аталган мактуб тайёрладим. Унда миллий жамоадан бутунлай кетадиган вақтимда халқимизга айтмоқчи бўлган сўзларим ёзилган. Мактуб ҳали ҳам менда сақланмоқда.

Турнир якунланиб, АҚШдан қайтиш учун самолётда кетаётганимизда Португалия футбол федерацияси президенти мендан миллий жамоани тарк этиш ҳақидаги қароримни қайта кўриб чиқишимни сўради. У федерация менинг жамоада қолишимни исташини таъкидлади.

Шундан сўнг у мендан янги бош мураббий номзоди ҳақида фикримни сўради. У бир нечта номзодларни кўриб чиқётганини айтди, аммо уларнинг исмларини менга ошкор қилмади. Мен президентга ўз фикримни билдириб, бу номзод тўғри танлов бўлишини айтдим.

Шунинг учун амалдаги бош мураббий расман таништирилган куни мен бу қарордан чин дилдан хурсанд бўлдим. Бу тўғри танлов эди ва натижалар ҳам буни тасдиқламоқда.

Орадан бир неча кун ўтиб, янги бош мураббий мен билан шахсан учрашмоқчи эканини айтди. Мен рози бўлдим ва учрашувни таътилларим якунига белгиладик.

Биз «Cidade do Futebol» мажмуасида учрашдик. Ўша пайтда клубим мавсумолди йиғинини шу ерда ўтказаётган эди.

Ўша куни мураббий менга менга ишонаётганини ва жамоадаги иштироким унинг режаси учун жуда муҳим эканини айтди. У ҳатто менинг терма жамоадаги иштироким бўйича аниқ режани тақдим қилди.

Мураббий биринчи ва сўнгги учрашувда майдонга тушишимни, жисмоний ҳолатимни ҳисобга олган ҳолда эса ҳар бир ўйинда уч-тўртта алмаштириш амалга оширилишини айтди.

Шунда у Норвегия ва Даниядаги учрашувларга миллий жамоа билан бормаслигим мумкинлигини ҳам таклиф қилди. Унинг режасига кўра, биринчи ўйинда майдонга тушиб, кейин Португалияда қолишим ва «Драгау»даги учрашув олдидан жамоага қайта қўшилишим керак эди.

Мен бу таклифни дарҳол рад этдим. Бу қарорни қабул қила олмаслигим менга аниқ эди. Гап хориждаги учрашувларда ўйнамаслигим ҳақида эмасди. Мен жамоа сардори сифатида терма жамоа билан бирга бўлишим керак эди. Португалияда қолиб кетиш мен учун яхши намуна бўлмасди. Мураббий охир-оқибат менинг фикримга қўшилди.

Бу суҳбатда «Ан Насср» спорт директори Симау Коутиниу ҳам иштирок этган. У ўтган мавсум давомида амалдаги бош мураббийга ҳисобот берган ва 2025 йилда уни клубга олиб келишда иштирок этган шахслардан бири эди.

Миллий жамоа йиғини бошланишидан бир кун олдин мураббийнинг ўзи Лиссабондаги уйимга яна бир бор суҳбатлашиш учун келди. Суҳбат тинч ўтди ва август ойида келишилган барча принциплар ўзгаришсиз қолди.

Мен «Алваладе»даги учрашувда майдонга тушдим. Кейин алмаштирилган бўлсам ҳам, буни муаммо қилмадим. Сардорлик боғичини Бруну Фернандешга ўзим топширдим. Ўша пайтда миллий жамоа футболчиси ва сардори сифатидаги сўнгги кунларимни ўтказаётган бўлишим мумкинлигини хаёлимга ҳам келтирмаган эдим.

Ўша куни мен учун энг муҳими жамоамизнинг ғалабаси эди. Ғалаба ҳар доим яхши, Португалия ва мамлакатинг учун ғалаба қозониш эса ундан ҳам муҳим.

Норвегияга қарши учрашув куни тушлик пайтида мураббийнинг ёрдамчиларидан бири жамоа билан овқатланаётган столим олдига келиб, бош мураббий мен билан гаплашмоқчи эканини айтди.

Мураббий мендан ўйинда 30 дақиқа майдонда ҳаракат қила олишимни сўраганида, мен мутлақо ҳайрон қолдим. Мен жисмоний тикланишимга тўлиқ эътибор қаратган, одатдагидек жамоадошларим билан бирга бўлган ва ўша куни умуман ўйнамаслигимни ўйлаётган эдим.

Бу сўров менинг жисмоний тикланиш ва машғулот режамдан ташқари эди. Чунки режага кўра, мен фақат «Драгау»даги учрашувда ўйнашим керак эди. Шунга қарамай, албатта, рози бўлдим. Мураббий менга шундай экан, 30 дақиқа ўйнашга тайёр туришим кераклигини айтди.

Қолган воқеаларни ҳамма билади. Мен иккинчи бўлим бошиданоқ қизиш машқларини бажардим, дақиқалар ўтиб бораётганини кузатдим, аммо майдонга тушиш учун чақирилмадим. Қисқаси, мураббий менга берган ваъдасида турмади», - деди Роналду.