«Улар мени миллий жамоада кўришни исташмаса, буни очиқ айтишлари керак» — Роналду

Криштиану Роналду Португалия миллий жамоасининг сўнгги йиғинини нима сабабдан тарк этганига яна бир бор ойдинлик киритди.

«Менга берилган ваъданинг яна бузилишини кутмасдан, йиғинни тарк этишга қарор қилдим. Мен учун инсонлар ўртасидаги муносабатларда ҳақиқат ҳамиша энг муҳим нарса бўлиб келган. Қанчалик оғриқли бўлмасин, менга ҳақиқатни айтишсин.

Матбуот анжумани бўлиб ўтган куни эрталаб Португалия футбол федерацияси президенти ва бош мураббий билан суҳбатлашдим. Улар буни албатта тасдиқлаши мумкин. Мен уларга яна бир бор айтдим: агар мени жамоада кўришни истамасалар, буни очиқ айтишлари керак. Мен учун самимий бўлишнинг ўзи етарли эди.

Мен бу қарорни қабул қилардим ва биз чиройли хайрлашувни ташкил қилишимизга ваъда бердим. Мен орзу қилаётганимдек, бу хайрлашув гўзал тарзда ўтиши ва ҳеч ким хафа бўлиб қолмаслиги мумкин эди.

Бу воқеани худди бугун бўлиб ўтгандек эслайман. Улар бир овоздан «йўқ» деб жавоб беришди. Яъни менинг жойим миллий жамоада эканини айтишди.

Қарийб 25 йиллик фаолиятим давомида бирор марта ҳам бош мураббий ёки миллий жамоа мураббийининг техник ёки тактик қарорларига аралашмаганман.

Менга нима қилиш таклиф қилинса, яхши ёки ёмон бўлишидан қатъи назар, қабул қиламан. Қарорларни ҳурмат қиламан. Аммо менга берилган ваъда бузилса, ўзимни бу жамоада керакли инсон сифатида ҳис қилмайман.

Шунингдек, йиғинни тарк этганим учун миллиц жамоадаги жамоадошларимдан ҳам узр сўрашим керак.

Мураббийнинг сўзига бўлган ишонч мутлақо бузилганига қарамай, бу суҳбатларга гувоҳ бўлган инсонлар ҳам буни тасдиқлаши мумкин, мен йиғинни тарк этмаслигим керак эди. Бунинг учун тўлиқ масъулият менинг зиммамда.

Португалия халқидан яна бир бор узр сўрайман. Аммо мен учун инсоннинг ўз сўзида туриши жуда катта аҳамиятга эга. Шу пайтдан бошлаб қолишим жамоага фақат зарар келтириши мумкинлигини ҳис қилдим.

Шунинг учун аввал ҳам айтганимдек, агар ўзимни жамоага фойдали деб ҳис қилмасам, нима қилишимни биламан: сумкаларимни йиғаман ва кетаман.

Менинг бу ҳаракатим учун жазо чораси Португалия футбол федерацияси томонидан белгиланиши керак. Жазода енгиллаштирувчи ҳолатлар бўлмаслиги кераклигини тушунаман.

Мен оддий футболчи эмасман — миллий жамоа сардориман. Шунинг учун бу ҳолатда бу мен учун оғирлаштирувчи омил ҳисобланади.

Мен аллақачон узр сўрадим, аммо ҳар қандай хатти-ҳаракатнинг оқибати бўлиши кераклигини яхши биламан. Футболда мен каби кўп йиллардан бери фаолият юритаётган ҳар қандай инсон шуни тушунадики, ким бўлишидан қатъи назар, қоидалар ҳамма учун бир хил.

Сўнгги пайтларда миллий жамоадаги фаолиятимни якунлаш ва менга муносиб хайрлашув учрашуви ташкил этилиши ҳақида кўп гап-сўзлар бўлди. Федерация менга шундай имконият беришни хоҳлаётгани айтилди.

Ҳаётда, кўпинча оч қолиб, егуликсиз қолган пайтларимда бир нарсани ўргандим: ҳеч ким ҳеч кимга ҳеч нарсани текинга бермайди.

Барча мухлисларимга, айниқса барча португалияликларга ваъда бераман: бизда бир ёки бир нечта хайрлашув учрашувлари бўлади. Бунинг учун ҳали вақт бор.

Аммо жамоа ҳақида ўйлаганимда, биринчи навбатда рақобат ва ғалаба ҳақида ўйлайман. Менга отамнинг вафоти ҳақида хабар берилган куни ҳам айнан шу ҳақда ўйлаганман.

Ўша пайтда миллий жамоа йиғинида эдим ва эртаси куни бўлиб ўтадиган учрашув якунига қадар жамоа билан қолишга қарор қилдим. Мен мамлакатим учун клубим учун ҳеч қачон қилмайдиган ишни қилдим.

Шунинг учун, агар жисмоний ҳолатим яхши бўлса, клубим сафида мунтазам ўйнаб, умид қиламанки, голлар уриб юрсам ва менга белгиланиши мумкин бўлган дисквалификацияни ўтаб бўлсам, аввалгидек миллий жамоага чақирувни қабул қилишга тайёр бўламан.

Мен Португалия миллий жамоаси учун яна майдонга тушиб, ғалаба қозониш учун курашаман. Ишонинг, мана шу — ҳақиқатнинг энг соф кўриниши», - деди Роналду.