«Манчестер Юнайтед»нинг собиқ ҳимоячиси Рио Фердинанд Криштиану Роналду билан боғлиқ вазият ҳақида фикр билдирди.
Эслатиб ўтамиз, 41 ёшли футболчи бош мураббий Жорже Жезуш 27 сентябр куни Норвегияга (2:1) қарши ўйинда уни майдонга туширмасликка қарор қилганидан сўнг Португалия миллий жамоасини тарк этган. Маълумотларга кўра, футболчи миллий терма жамоа сафида бошқа ўйнамасликка қарор қилган.
«Криштиану Роналдуга нисбатан адолатсиз муносабатда бўлишди. Жуда ёмон муносабатда бўлишди. Янги мураббий келди ва ўзини Алекс Фергюсондек тута бошлади. Бу қарорни қандай асосда қабул қилганини билмайман. Ва бу ҳолат мамлакатни иккига бўлиб қўйди.
Бу вазиятни кўриш ёқимсиз. Менимча, ҳеч бир футболчи миллий жамоадаги фаолиятини бундай тарзда якунламаслиги керак. Менимча, бироз дам олиб, алоҳида вақт ўтказишганидан сўнг улар муносабатларини тиклашади. Миллий жамоа, федерация президенти ва мураббий ўзларининг нотўғри иш тутганини тушуниб етишади, деб ўйлайман. Чунки жамоанинг асосий футболчиси, энг яхши элчиси ва мамлакат тарихидаги энг машҳур инсонлардан бирининг милдий жамоани шундай тарзда тарк этишига йўл қўйиб бўлмайди.
Биламан, одамлар: «Нега у кетди?» деб сўрашади. Ҳеч биримиз воқеаларнинг ички томонини билмаймиз. Аммо мен бир нарсани биламан: Криштиану — принципиал инсон ва у ишонган нарсаларини ҳимоя қилади. Агар у ўзига нисбатан адолатсиз муносабатда бўлишганини ёки унга берилган ваъда бузилганини ҳис қилса, бунга кўнмайди. Ва мен буни ҳурмат қиламан.
Биламан, кўпчилик бундай вазиятга кўникиб кетиши мумкин эди, аммо Криштиану ўз қадрини билади. Мен буни ҳар куни кўрганман. Криштиану фақат голлар ва ассистлар олиб келмайди — у Португалия ва миллий жамоага илгари бу мамлакат ҳақида ҳатто эшитмаган одамларнинг ҳам эътиборини жалб қилади. Криштиану Роналду туфайли миллий жамоа футболкалари Португалия қаерда жойлашганини ҳам билмайдиган дунёнинг турли ҳудудларида сотилади.
Шунинг учун айрим ўйинчиларга бошқалардан фарқли муносабатда бўлиш керак. Англияда Бекҳэмга ҳам бошқалардек муносабатда бўлишмаган, тўғрими? Португалияда Криштиануга, Аргентинада Мессига, Бразилияда Роналдога ҳам шундай муносабат керак. Бундай футболчиларга алоҳида ёндашув талаб этилади.
Ҳурмат бўлиши шарт. Менимча, Криштианунинг миллий жамоани тарк этишига олиб келиши мумкин бўлган ягона сабаб — у ўзини ҳурмат қилишмаяпти, деб ҳис қилган бўлиши. Унда эго бор ва агар у ўзини ҳурмат қилишмаётганини ҳис қилса, бунга муносабат билдиради. Айнан шу эго бўлмаганида, у бугунги даражага етиша олмаган бўларди — мен санаб ўтган футболчиларда ҳам худди шундай.
У эгоси туфайли барча ютуқларга эришди. Шунинг учун уни баъзи вазиятларда намоён қилишга, бошқа ҳолатларда эса бостиришга уриниб бўлмайди. У доимо намоён бўлиши керак», — деди Фердинанд ўз подкастида.
