«Барселона» ва Испания миллий жамоасининг собиқ яримҳимоячиси, айни вақтда «Галф Юнайтед» бош мураббийи Андрес Иниеста 2026 йилги «Олтин тўп» соҳиби ким бўлиши кераклиги ҳақида фикр билдирди.
Испаниялик мутахассис журналист билан суҳбатда миллий жамоасининг жаҳон чемпионатидаги ғалабасини ҳам ёдга олди ва ҳозирги авлод футболчиларининг имкониятларига баҳо берди.
«Бу жуда чиройли ва ўзига хос ҳиссиёт эди. 16 йилдан сўнг яна стадиондан туриб миллий жамоанинг жаҳон чемпиони бўлганини кўриш — ажойиб.
Бир юлдузнинг ўзи ҳам жуда яхши, аммо иккита юлдуз миллий жамоа ва бутун мамлакатни мутлақо бошқа даражага олиб чиқади деб ўйлайман.
Бу авлод футболчилари кўп нарсага эриша олади. Энг муҳими — буни жуда чиройли тарзда амалга ошириш. Чунки бир неча йиллик истиқболга назар ташласак, бу жамоанинг деярли бутун асосий таркиби яна олти йилдан кейин ҳам футбол ўйнашда давом эта олади. Бу ҳақиқатан ҳам ижобий жиҳат.
«Олтин тўп» масаласига келсак, уни испаниялик футболчи қўлга киритишини истардим. Уларнинг ҳам индивидуал, ҳам жамоавий даражада эришган ютуқларини ҳисобга олсак, бу жуда чиройли бўлар эди. Менимча, айнан шундай бўлиши керак», — деди Иниеста Marca нашрига берган интервюсида.
Маълумот ўрнида, «Олтин тўп» мукофоти шу йилнинг 26 октябр куни Лондонда топширилади. Аввалроқ ушбу совринга номзод 30 нафар футболчи эълон қилинганди.
