АҚШнинг Ню-Жерси штати ҳукумати ФИФАнинг ЖЧ-2026 финали якунланганидан сўнг «Метлайф» стадиони майдонидаги чим бўлакларини сотиш режасига норозилик билдирди.
Штат губернатори Мики Шеррилл ва маҳаллий қонунчилар стадион қопламасини алмаштириш учун миллионлаб доллар айнан штат бюджетидан сарфланганини эслатиб, тушадиган даромаддан солиқ тўловчилар ҳам улуш олиши кераклигини маълум қилди.
«Губернатор аввал ҳам таъкидлаганидек, Ню-Жерси стадион қопламаси учун миллионлаб доллар тўлади ва штат солиқ тўловчилари ушбу савдодан тушадиган маблағнинг бир қисмига ҳақли», — деди губернатор вакили Daily Mail нашрига.
ФИФА финал баҳсидан кейин майдон чимининг бўлакларини 450 доллардан сотувга қўйган. Махсус коллекция вариантлари эса 3000 долларгача баҳоланган.
Штат қонунчилик палатаси аъзоси Майк Инганаморт бундай савдони ноқонуний деб атаб, ҳукуматни уни суд орқали тақиқлаш чораларини кўришга чақирди.
ФИФА эса ўз навбатида тушумнинг асосий қисми минтақавий ташкилий қўмитага йўналтирилишини, федерация эса фақат номинал миқдордаги роялти олишини маълум қилди.
Эслатиб ўтамиз, ЖЧ-2026 финал баҳси 19 июл куни Ню-Жерсидаги «Метлайф» стадионида Аргентина ва Испания миллий жамоалари ўртасида бўлиб ўтади.
