«Милан» яримҳимоячиси Лука Модрич нима сабабдан клуб билан шартномасини узайтиришга қарор қилганини маълум қилди.
Жаҳон чемпионати бошланишидан аввал 40 ёшли футболчи мундиалдан кейин фаолиятини якунлаши мумкинлиги ҳақида хабарлар тарқалган эди. Бироқ июл ойида у «россонери» билан 2027 йилнинг ёзигача мўлжалланган янги шартнома имзолади.
«Менда ҳеч қандай шубҳа йўқ эди — бошиданоқ «Милан»да қолишни хоҳлаганман. Шартномани декабр ойидаёқ узайтиришим мумкин эди, аммо мавсум охиригача кутишга қарор қилдим. Танам ўзини қандай ҳис қилиши ва футболга бўлган иштиёқим ўзгармаганини билишни истадим», — деди Модрич Sky Sport нашрига.
Хорватиялик футболчи «Милан»га фақат совринлар ютиш учун келганини ҳам таъкидлади.
«Мен бу ерга шунчаки завқланиш учун келмаганман. «Милан» билан ғалаба қозонишни хоҳлайман. Мақсадим — жамоага А Серия чемпионлиги ёки бошқа совринларни қўлга киритишда ёрдам бериш.
Кўплаб футболчиларнинг жамоада қолганидан хурсандман. Клуб янги футболчиларни ҳам олиб келди ва улар таркибимизни янада кучайтиришига ишонаман. Умумий муваффақият учун ҳар бир футболчининг ҳиссаси муҳим бўлади», — деди тажрибали яримҳимоячи.
Маълумот учун, Лука Модрич 2025 йилнинг ёзида Мадриднинг «Реал» клубидан «Милан» сафига кўчиб ўтган эди.
Мухлислар бу янгиликни Telegram’да муҳокама қилмоқда
Изоҳлар Telegram’да очилади