Мадридликлар узоқ вақт унута олмайдиган “йўқ”нинг сабаблари

Аввало, бир нарсани аниқлаштириб олиш муҳим: Родри Эрнандеснинг орзуси доимо “Реал”да ўйнаш бўлган. Аммо тақдирнинг ўйини шундаки, унинг “қироллик клуби”га ўтиш учун илк имконият шу ёзда юзага келганди, қайта-қайта пухта ўйланган қарор ҳам испаниялик ярим ҳимоячининг охир-оқибат “Барселона” билан шартнома имзолашига олиб келди.

Ҳа, футбол баъзан шунақа ғалати. Чунки жаҳон юлдузлари доимо ўзлари истаган жойда ўнлайди, деган қараш бор. Аммо бу сафар Родри болалик орзусидан воз кечишга қарор қилди. Қуйида “Реал” мухлислари узоқ вақт унута олмайдиган қарорнинг айрим сабаблари келтирилган “Marca” мақоласини тақдим этамиз.

Аввало, воқеаларни тўлиқ тушуниш учун Родрининг “Реал”га ўтишдаги биринчи имкониятига қайтиш керак. Бунинг учун 2019 йилга қайтамиз. Ўша пайтда Родри “Атлетико” футболчиси эди, аммо Пеп Гвардиола бошчилигидаги “Манчестер Сити” унга жиддий қизиқиш билдирганди. Ўша ёзда ярим ҳимоячи охирги дақиқага қадар “Реал”дан таклиф келишини кутди. Аммо ўша вақтда Мадрид клубида Тони Кроос, Лука Модрич ва Каземиро бор эди, шунинг учун Родри “Реал” учун ҳеч қачон чинакам вариант бўлмади.

Натижада, у шартномасидаги товон пулини тўлаб, Манчестерга йўл олди. Ҳозир орқага қараб баҳолайдиган бўлсак (ўтмишни таҳлил қилиш доим осон-да) бу унинг ҳаётидаги энг тўғри қарор бўлган. Испаниялик мураббий унинг футболдаги фаолиятини бутунлай ўзгартирди ва ярим ҳимоячидаги барча имкониятларни бошқалардан кўра яхшироқ очиб берди.

Энди эса сўнгги имкониятга ўтамиз.

“Реал” мухлислари шу ёз давомида Родрини олиб келишни қаттиқ талаб қилган бўлса-да, клубнинг ўзи бу трансферга ҳеч қачон тўлиқ ишонч билан ёндашмади. Аксинча, Родри Жаҳон чемпионати финалидан кейинги барча ажойиб ўйинлари билан яна бир бор ўзини намоён қилгачгина “Реал”даги иккиланишлар барҳам топди ва бу имкониятни қўлдан чиқармаслик кераклигини кўрсатувчи бир қанча омиллар пайдо бўлди.

Футболчининг “Сити” билан шартномасида сўнгги йил қолган, унинг Манчестерда қолишида Гвардиоланинг давомийлиги доимо муҳим омил бўлиб келган, у эса кетмоқда ва қолаверса Родри бу вақтга келиб “Реал”га етишмаётган кўплаб жиҳатларни ўзида мужассам этганди. Родри “қўл етадиган” футболчига айланди. Балки бутун муаммо ҳам шунда бўлгандир: клуб трансферни мутлақ ишонч билан эмас, шунчаки уриниб кўриш учун бошлади. Футболчи эса буни сезди.

Валдебебасда айтилган гап

Испания терма жамоаси иккинчи юлдузини қўлга киритганидан кейин “Реал” ишга киришди. Флорентино Перес, Хосе Анхел Санчес қўнғироқ қилди ва шу билан тугади. Бундай ҳолатлар учун бу ғалати. Чунки жаҳон даражасидаги юлдузни трансфер қилиш жараёни одатда бутун клуб ҳаётини тўхтатиб, барча раҳбарлар ва мутахассисларни ишга жалб қилади. Аммо бу ерда ҳикояни яна бир бор тўхтатишга тўғри келади. Чунки ўша қўнғироқлардан олдин “Реал” ичида ҳали жуда кўп иккиланиш бор эди. Албатта, Родри жамоага фойда келтириши ва таркибни кучайтириши аниқ эди. Аммо у клуб излаётган футболчи профилига тўлиқ мос келмасди. Ёши жиҳатидан ҳам, футбол услуби жиҳатидан ҳам.

“У тўпни ўзида жуда кўп сақлаб туради, биз излаётган футболчи у эмас”, деган гап Валдебебасда қаттиқ акс садо берди. Қайси томондан қараманг, буни тушуниш қийин. “Реал” марказда янада динамик ва жисмоний жиҳатдан кучлироқ футболчи қидираётган эди.

Родрининг Жаҳон чемпионатидаги статистикаси ва фантастик рекорди ҳам гўё аҳамиятсиз эди: у бир Жаҳон чемпионатида бошқа ҳар қандай футболчидан кўпроқ аниқ пас берган ва пасларининг 93 фоиздан зиёди ўз манзилига етган.

Аммо юқорида айтилганидек, Родри “қўл етадиган” вариантга айланди ва “Реал” трансферни амалга оширишга шунчаки уриниб кўрди. Агар футболчига қизиқиш биринчи кунданоқ кучли бўлмаса, ишлар ҳам лозим даражада кечмайди.

Масалан, Моуринио Кукуреляга қўнғироқ қилди. “Атлетико” Бернарду Силвани олиш учун босимни кучайтирган пайтда португалиялик футболчига ҳам бир неча бор қўнғироқ қилди. Фарқ мана шунда: лойиҳанинг муҳим қисми бўлиши керак бўлган футболчини олиш учун ҳақиқий қизиқиш ва хоҳиш бор эди.

“Барселона” эса Родри учун бор артиллериясини ишга солди. Деку, Лапорта, Флик ва деярли бутун жамоа унга қўнғироқ қилди. Бироз қолса, клуб боғбони ҳам телефонни кўтариб, испаниялик ярим ҳимоячи майсани қай даражада баланд бўлишини хоҳлашини сўраб қолиши мумкин эди. Аммо йўқ, Родри фақат қўнғироқлар сабаб “Барселона”ни танлагани йўқ.

Кучли лойиҳа ва қўнғироқлардаги фарқ

Яна бир муҳим жиҳатни таъкидлаш керак: икки клубнинг молиявий таклифи бир хил бўлган. Балки “Реал” мухлисларига энг оғир ботадиган жиҳат ҳам шу.

Родри дуппа-дуруст ўйнаб юрган клубини пул учун тарк этмаяпти, у лойиҳа учун кетмоқда. Унинг футбол услуби “Барселона” фалсафасига идеал даражада мос келади. Бу Испания терма жамоасини Жаҳон чемпионатида ғалабага элтган услубнинг ўзи. Қолаверса, каталонияликларнинг лойиҳаси аллақачон мустаҳкам пойдеворга эга: муҳим таянчлар белгилаб қўйилган, жамоадаги иерархия аниқ.

“Реал”да эса лойиҳа ҳали ҳам соат механизми каби хавфли. Албатта, ундан “Ролекс” чиқиши мумкин. Ахир бу “Реал”. Аммо у муддатидан олдин сочилиб кетиши ҳам мумкин. 30 ёшли футболчи учун бундай ноаниқликни қабул қилиш қийин. Айниқса, рақиб томонда уни олиб келиш учун ҳамма ҳаракатга келган бир пайтда.

Шунинг учун Родри ўз қарорини аниқ қилгач, биринчи бўлиб “Реал”га, Хосе Анхел Санчесга қўнғироқ қилди. Клубнинг қизиқиши, ҳурмати ва одобли муносабати учун миннатдорлик билдирди ва футболчи ўзи ҳеч қачон бошламаган трансфер сериалини якунлади. Шундан сўнг у “Барселона”нинг “Манчестер Сити” билан келишувини кута бошлади. Каталония клуби инглизларни ишонтириш учун бешта таклиф беришга мажбур бўлди.

Шунинг учун ҳафталар ўтгани сари “Реал” Родрини қандай қилиб қўлдан чиқарганини тушуниш тобора қийинлашмоқда. Бу “Манчестер Сити”нинг янги шартнома таклифларини рад этиб, “Реал”дан қўнғироқ келишини кутган футболчи эди. Алал-оқибатда қўнғироқ бўлди, аммо таклиф Родри болалигида орзу қилган таклиф эмасди. Родри доимо “Сантиаго Бернабеу”га катта саҳнадан, ўзини ҳар доим қўллаб-қувватлаган мухлислар олдига чиқишни тасаввур қилган.

“Реал”даги минглаб саволлар ва иккиланишлар бозордаги навбатдаги имконият бой берилгани ҳақида. Чунки “Барселона” худди шу имкониятни кўрди ва бор кучи билан ундан фойдаланишга ташланди.