«Ливерпул» 35 ёшли марказий ҳимоячи Виржил ван Дейкнинг узоқ муддатли ўрнини босадиган футболчи изламоқда. Мерсисайд клуби ушбу позиция учун «Ноттингҳэм Форест» сафида ўйнаётган 24 ёшли Муриллони асосий номзодлардан бири сифатида кўрмоқда. Бу ҳақда Football Insider хабар берди.
Манбага кўра, бразилиялик футболчига «Челси» ҳам қизиқиш билдирмоқда. Бироқ «Ноттингҳэм Форест» қишки трансфер ойнасида Мурилло бўйича келиб тушадиган таклифларни кўриб чиқмоқчи эмас.
Клубнинг ҳимоячи билан узоқ муддатли шартномага эга экани ҳам трансферни амалга оширишни мураккаблаштириши мумкин. Муриллонинг «Ноттингҳэм Форест» билан амалдаги шартномаси 2030 йилнинг ёзигача мўлжалланган.
Мурилло ушбу мавсумда барча турнирларда олтита баҳсда майдонга тушиб, битта голли узатмани амалга оширди. Тransfermarkt портали бразилиялик ҳимоячининг бозор қийматини 50 млн еврога баҳоламоқда.
Маълумот учун, Мурилло 2023 йилда Бразилиянинг «Коринтианс» клубидан «Форест»га кўчиб ўтган ва қисқа вақт ичида жамоанинг асосий ҳимоячиларидан бирига айланган.
Эслатиб ўтамиз, Виржил ван Дейк 2018 йил январидан бери «Ливерпул» шарафини ҳимоя қилиб келмоқда. Нидерландиялик футболчи клуб билан Англия чемпионати ва Чемпионлар лигасида ғолиб чиққан.
