«Ливерпул» клуби «Лейпциг»га ҳужумчи Ян Диоманднинг трансфери учун 100 млн еврога яқин сумма тўлашга тайёрлигини маълум қилди. Бу ҳақда The Athletic журналисти Давид Орнштейн хабар бермоқда.
Манбанинг хабарига кўра, «қизиллар» ивуарлик 19 ёшли футболчи учун курашда етакчилик қилмоқда.
Шу билан бирга, мерсисайдликлар бошқа ҳужумчини сотиб олиш вариантини кўриб чиқишга тайёр, чунки «РБ Лейпциг» Диомандни сотмоқчи эмас. «ПСЖ» ҳам вингерга даъвогарлик қилмоқда.
Ўтган мавсумда Диоманд барча турнирларда 36 та ўйинда иштирок этиб, 13 та гол ва 10 та голли узатма муаллифига айланди.
Футболчининг клуб билан амалдаги меҳнат шартномаси 2030 йилнинг ёзигача мўлжалланган.
Transfermarkt порталида тақдим этилган маълумотларга кўра, футболчининг бозор қиймати 90 млн еврони ташкил этади.
