Якшанба куни «Челси» ҳимоячиси Марк Кукурелянинг Мадриднинг «Реал» клубига ўтиши бўйича келишувга эришилгани ҳақида хабарлар тарқалди. Бу ҳақда ишончли инсайдер Фабрицио Романо маълум қилди.
Унинг сўзларига кўра, инглиз ва испан клублари трансфернинг асосий шартларини келишиб олган.
Қизиғи шундаки, бундан атиги икки ярим ой аввал Кукуреля «Реал»га эҳтимолий трансфер ҳақида кескин фикр билдирганди.
«Агар танлов қилиш керак бўлса: сочимни олдиришми ёки «Реал»да ўйнашми? Мен сочимни олдирган бўлардим», — деган эди футболчи март ойидаги интервюсида.
Эндиликда ушбу баёнот ижтимоий тармоқларда яна кенг муҳокама қилинмоқда. Футболчи яқин орада бу интервю ҳақидаги ноқулай саволларга жавоб беришига тўғри келиши мумкин.
Хабарларга кўра, Кукуреля жаҳон чемпионати якунланганидан кейин янги клубига қўшилади.
Аввалроқ Мадрид клуби бош мураббийлигига Жозе Моуринио тайинлангани эълон қилинганди. Фабрицио Романонинг таъкидлашича, португалиялик мутахассис айнан Кукуреляни чап қанот ҳимояси учун устувор номзод сифатида кўрмоқда.
