ФИФА 2029 йилдан бошлаб Клублар ўртасидаги жаҳон чемпионати иштирокчилари сонини 32 тадан 48 тагача оширишни режалаштирмоқда.
Тhe Guardian нашрининг хабарига кўра, бунга ФИФА ва Европа клублари уюшмаси (EFC) ўртасида эришилган янги ҳамкорлик келишуви сабаб бўлади.
Манбага кўра, томонлар турнирни ташкил этиш ва унинг тижорий ривожланиши билан шуғулланадиган қўшма корхона тузишга келишиб олган. Бу ҳамкорлик мусобақани кенгайтириш жараёнини тезлаштириши кутилмоқда.
2025 йилги турнирда Европадан 12 та клуб қатнашган бўлса-да, «Ливерпул», «Барселона» ва «Наполи» каби жамоалар иштирок эта олмаганди. Амалдаги саралаш тизимига кўра, Чемпионлар лигаси ғолиблари, УEФА рейтингидаги энг яхши клублар ва ҳар бир мамлакатдан кўпи билан икки жамоа қатнашиши мумкин.
EFC ушбу чекловни бекор қилиш тарафдори. Агар ўзгаришлар тасдиқланса, Англиядан «Арсенал», «Ливерпул» ва «Манчестер Сити» каби клублар учун қўшимча йўлланмалар очилиши мумкин.
Маълумот учун, ФИФА янги форматдаги Клублар ўртасидаги жаҳон чемпионатини илк бор 2025 йилда 32 та жамоа иштирокида ўтказган эди. Эндиликда мусобақа кўламини янада кенгайтириш масаласи кўриб чиқилмоқда.
