Федерико Киеза ёзги трансферлар ойнасида «Ливерпул»ни тарк этиши мумкинлигини маълум қилди.
28 ёшли футболчи ўтган мавсумда етарлича ўйин амалиётига эга бўлмагани сабабли келажаги борасида клуб ва янги бош мураббий Андони Ираола билан суҳбатлашишни режалаштирмоқда.
«Мен ўйнашни хоҳлайман. Агар Премер Лигада барқарор ўйин амалиётига эга бўлмасам, уни бошқа жойдан излашимга тўғри келади. Ўтган мавсум жуда кам дақиқаларда майдонга тушдим. АҚШдаги йиғинга бораман, кейин клуб ва Ираола билан гаплашамиз», — деди футболчи Gazzetta dello Sport нашрига.
Кеза 2026 йил бошидан буён кам ўйнаганини таъкидлади ва январ ойида ҳам клуб уни қўйиб юбормаганини эслатиб ўтди.
«Ливерпул» билан муносабатларим жуда яхши. Январда клуб ва Арне Слот кетишимга рухсат бермади. Жамоага керак эдим. Таркибда муаммолар бор эди ва мен вазиятни тушундим. Ахир гап «Ливерпул» ҳақида кетмоқда. Ўтган йили улар билан Премер Лига чемпионига айландим», — дея қўшимча қилди италиялик футболчи.
Шунингдек, Киеза «Ювентус»га қайтиш ёки Европа Чемпионлар лигасида қатнашадиган «Комо»га ўтиш эҳтимоли ҳақида ҳам фикр билдирди.
«Мен барча вариантларга очиқман. Мен учун энг муҳими — ўйин амалиёти. Ўзимни асосий таркиб футболчиси бўлишим шарт деб ҳисобламайман. Қаерда бўлмасин, ўрним учун курашишга тайёрман», — деди вингер.
Эслатиб ўтамиз, Киеза ўтган мавсум Англия Премер Лигасида фақат бир марта асосий таркибда майдонга тушган эди.
Маълумот учун, италиялик футболчининг номи сўнгги ҳафталарда «Ювентус» ва «Комо» клублари билан боғланмоқда.
