«Ливерпул» клуби бош мураббийи Андони Ираола Чемпионлар лигаси умумий босқичи 4-туридан ўрин олган «Фенербаҳче»га (2:3) қарши баҳсдан сўнг ўз фикрларини билдирди.
«Фенербаҳче» стандарт вазиятлардан фойдаланиш борасидаги энг хавфли жамоалардан бири эканини яхши билардик. Аммо барибир жарима зарбаси, бурчак тўпи ва ҳатто учрашувнинг сўнгги дақиқаларидаги ён чизиқдан тўпни ўйинга киритишдан кейин гол ўтказиб юбордик. Бу голлар бизга жуда оғир ботди. Чунки ўйин давомида икки марта ҳисобда олдинга чиқдик, учрашув суръатини назорат қилдик ва ҳужумда ўз имкониятларимизни яратдик. Бироқ кейинчалик ҳимояда анча ишончлироқ ҳаракат қилишимиз керак бўлган вазиятларда гол ўтказиб юбордик.
Албатта натижадан жуда қаттиқ хафа бўлдим. Чунки ушбу стадионда ҳар қандай рақибга қарши ўйнаш қийин. Учрашувнинг катта қисмида ғалабани қўлга кирита олишимизга ишончимиз комил эди, аммо буни уддалай олмадик.
Айниқса, биринчи ва учинчи голларни ўтказиб юборганимиз аламли бўлди. Жарима зарбаси ижро этилган вазиятда деворни нотўғри ташкил қилдик. Ҳал қилувчи голда эса Ведат Мурики ҳаводаги курашда бир йўла уч нафар ҳимоячимиздан устун келди. Бундай вазиятларда биз шунчаки яхшироқ ҳаракат қилишимиз шарт», — дея Ираоланинг сўзларини BBC нашри келтирмоқда.
