Форлан Роналдунинг Жаҳон чемпионати ўйинларидаги асосий муаммосини айтди

Уругвайлик собиқ ҳужумчи Диего Форлан Криштиану Роналдунинг Португалия миллий жамоаси сафидаги ўйинларидаги асосий муаммони айтиб ўтди.

«Ҳужумчи сифатида айтсам, муаммо шундаки, Криштиану ҳужум марказида ҳаракат қилади — бу унинг энг кучли жиҳати. У ҳақиқий «тўққизлик» сифатида ўйнайди ва голли вазиятларни якунлаш учун олдинги чизиқда қолади. Энди у тўпни қабул қилиш учун ортга тушмайди. Аммо бу, охир-оқибат, Португалиянинг имкониятларини чеклаб қўяди.

Бу — одатий ҳолат: «Мен дарвозага яқин турсам, гол уриш имконияти кўпроқ бўлади», деб ўйлайсиз. Лекин бу жамоага зарар етказаётганини тушунмайсиз. Чунки рақибнинг икки марказий ҳимоячиси ҳам ўз жойида қолади, сиз эса ҳаракат қилмайсиз. Улардан бири сизни мўлжал сифатида назорат қилади, иккинчиси эса уни суғурталайди. Натижада ҳеч ким сизга тўп етказиб бера олмайди, чунки барча бўш ҳудудлар ёпилиб қолади.

Агар у бироз қанотга силжиганида, бошқа футболчилар бўш ҳудудга югуриб кирар ва у ҳам голли вазият ярата оларди. Айнан шу ерда Португалия хато қилмоқда. Роналду буни тушуниши керак. Унга: «Ҳаракат қил, жойингни ўзгартир — шунда нимадир қила оласан», деб айтиш лозим», — деди Форлан ESPN нашрига берган интервюсида.