«Барселона» бош мураббийи Ҳанс-Дитер Флик футболчи Ламин Ямалнинг ривожланишига тўсқинлик қилишни истамаслигини, шу билан бирга, унинг майдонда ўтказаётган вақтини назорат қилиш кераклигини таъкидлади.
«Ламин — ўзига хос футболчи. Шунингдек, унинг майдонда ўтказаётган вақтини назорат қилишимиз кераклигини ҳам тушунаман. Лекин Ямал учун энг муҳими — футболдан завқ олиш. Ҳозир айнан шундай бўлмоқда.
Шунинг учун бу жараёнга ҳалақит қилишни истамайман. Бироқ унинг ўйин амалиётини ҳам назорат қилишимиз кераклигини тушунаман», — дея Фликнинг сўзларини келтиради AS нашри.
Маълумот ўрнида, бу мавсумда Ямал барча мусобақаларда 10 та учрашувда майдонга тушиб, 8 та гол урди ва 9 та голли узатмани амалга оширди. Унинг каталонияликлар билан амалдаги шартномаси 2031 йилнинг ёзигача мўлжалланган.
Эслатиб ўтамиз, бугун «Барселона» Ла Лиганинг 9-тури доирасида «Бетис»га қарши майдонга тушади. Беллашув Тошкент вақти билан соат 21:30 да бошланади.
