«Астон Вилла» собиқ бош мураббийи Стивен Жеррард яна мураббийликка қайтишни кўриб чиқмоқда. Бу ҳақда talkSPORT нашри хабар берди.
Маълум қилинишича, у «Рексҳэм» раҳбарияти амалдаги бош мураббий Фил Паркинсон билан хайрлашишга қарор қилса, жамоани бошқаришга тайёр.
Уэлс клуби раҳбарияти ҳозирча мураббийнинг келажаги борасида бир тўхтамга келмаган. Натижалар туфайли Паркинсонга босим кучайган бўлса-да, унинг клуб эгалари билан яхши муносабатлари сақланиб қолмоқда.
Раҳбариятнинг айрим вакиллари мутахассисни вазифасидан озод қилишга қарши. Вазиятни янги спорт директори Стив Никсон ҳам ўта салбий баҳоламаяпти.
Қайд этиш лозим, Чемпионшипнинг 10-туридан кейин «Рексҳэм» 17-ўринда бормоқда. Жамоа 2 марта ғалаба қозонган, 5 бор дуранг ўйнаган ва 3 та учрашувда мағлуб бўлган. Паркинсоннинг эҳтимолий ўринбосарлари қаторида Скотт Паркер номи ҳам тилга олинмоқда.
Маълумот ўрнида, Жеррард 2025 йил январ ойида Саудия Арабистонининг «Ал Иттифоқ» клубидаги фаолиятини якунлаганидан буён ишсиз қолмоқда. Ҳозирда у TNT Sports телеканалида футбол эксперти сифатида фаолият юритмоқда.
