«Челси» янги титул ҳомийсини излашда муаммоларга дуч келмоқда. The Telegraph хабарига кўра, клуб билан ҳамкорлик қилишга қизиқаётган компаниялар ҳомийлик битимини тахминан 30 миллион фунт стерлингга баҳоламоқда. Бироқ бу сумма Лондон клуби раҳбариятини қониқтирмаяпти.
Манбада айтилишича, «Челси» потенциал титул ҳомийсидан йилига 60 миллион фунт стерлинг олишни истамоқда. Бу эса таклиф қилинаётган маблағдан икки баравар кўпдир.
«Суммалар ўртасидаги катта тафовутни ҳисобга олсак, титул ҳомийсини излаш жараёни яна чўзилиб кетиши мумкин», — дейилади хабарда.
Қайд этилишича, клубнинг спорт натижалари ҳам музокараларга таъсир қилаётган бўлиши мумкин. «Челси» ўтган мавсум якунларига кўра Еврокубокларга йўлланма ола олмади.
Эслатиб ўтамиз, Лондон клуби Премер Лига сўнгги турида «Сандерленд»га мағлуб бўлиб, ҳатто Конференциялар лигаси йўлланмасидан ҳам қуруқ қолди.
Маълумот учун, титул ҳомийси клуб футболкаси олд қисмида реклама жойлаштириш ҳуқуқига эга бўлган асосий тижорий ҳамкор ҳисобланади.
