«Брентфорд» «Кёлн»нинг ёш футболчиси Саид Эл Мала трансферини якунлаш арафасида турибди.
Bild хабарига кўра, Англия клуби 20 ёшли футболчи учун яхшиланган таклиф билан чиққан ва томонлар келишувга яқинлашган. Битимнинг умумий қиймати бонуслар билан бирга 50 миллион еврогача етиши мумкин.
Манбада айтилишича, ушбу сумманинг 45 миллион евроси кафолатланган тўлов бўлиб, қолган қисми турли бонуслар кўринишида тўланади.
Агар трансфер амалга ошса, бу «Кёлн» тарихидаги энг қиммат сотувга айланади. Клубнинг аввалги рекорди 2018 йилда Антони Модестенинг «Тянцзин Сюанцзян»га 29 миллион евро эвазига трансфери бўлган.
Келишувга кўра, немис клуби футболчининг кейинги трансферидан 15 фоиз улуш олиш ҳуқуқини ҳам сақлаб қолади.
Қайд этилишича, битим якунланиши учун футболчининг вакили ҳисобланган онасининг розилиги қолган. «Брентфорд» бошқа клублар аралашиб кетмаслиги учун таклифига маълум муддат белгилаган.
Эслатиб ўтамиз, Саид Эл Мала «Кёлн» асосий жамоасида атиги бир мавсум ўйнаган бўлса-да, Европанинг энг истиқболли ҳужумкор футболчиларидан бири сифатида баҳоланмоқда.
Маълумот учун, футболчи «Брентфорд»да йилига 4 миллион евродан ортиқ маош олиши кутилмоқда.
