Мадриднинг «Реал» клуби «Атлетико» форварди Хулиан Алваресни сотиб олишга уриниб кўрди.
«Матрасчилар» аргентиналик футболчисини 150 млн евро эвазига ҳам рақобатчи сафига қўйиб юборишни истамади.
Mundo Deportivo нашрининг хабарига кўра, «Барселона»дагилар «Реал» Алварес трансфери учун таклиф билан чиқишини аввалдан билган. Флорентино Перес 150 млн евро эвазига юлдуз футболчи сотиб олмоқчилиги ҳақида айтганидаёқ, Каталония клубидагилар гап катта эҳтимол аргентиналик ҳақида кетаётганини тахмин қилишган. Шу йўл билан «қаймоқранглилар» «Барселона» бундай сумма тўлай олмаслигини билган ва асосий рақобатчиси ҳолатини янада қийинлаштиришини мақсад қилган.
Маълумот учун, Transfermarkt портали Хулиан Алвареснинг актуал трансфер нархини – 100 млн еврога баҳоламоқда. 26 ёшли футболчининг «Атлетико» билан шартномаси 2030 йилгача амал қилади.
