«Барселона» Мадриднинг «Атлетико» клубида тўп тепаётган Хулиан Алваресни таркибига қўшиб олиш вариантини кўриб чиқмоқда. Fichajes хабарига кўра, каталонияликлар аргентиналик ҳужумчи учун футболчи алмашинуви ва қўшимча маблағ таклиф қилиш имкониятини ўрганмоқда.
Манбага кўра, «Барселона» эҳтимолий келишув доирасида Френки де Йонг, Алехандро Балде ёки Дани Олмони «Атлетико»га таклиф қилиши мумкин. Бироқ ҳозирча клублар ўртасида ушбу трансфер бўйича расмий музокаралар бошланганича йўқ.
«Барселона» ёзги трансфер ойнасида ҳам Алваресни сотиб олишга уриниб кўрган. Аммо «Атлетико» ўзининг асосий футболчиларидан бирини сотишдан бош тортган. Эндиликда каталонияликлар футболчи алмашинуви орқали ушбу трансферни амалга ошириш имкониятини кўриб чиқмоқда.
Маълумот учун, 26 ёшли Алварес ушбу мавсумда барча турнирлар доирасида 4 та баҳсда майдонга тушиб, 1 та голли узатмани амалга оширди.
Эслатиб ўтамиз, аргентиналик ҳужумчи «Атлетико»га 2024 йил ёзида «Манчестер Сити»дан кўчиб ўтган.
