«Милан» ҳимоячи Фикаё Томори ва яримҳимоячи Рубен Лофтус-Чик билан шартномаларни узайтирмасликка қарор қилди. Бу ҳақда Foot mercato хабар берди.
Манбага кўра, ҳар икки футболчининг «Милан» билан амалдаги шартномаси келаси ёзда якунланади. Италия клуби уларнинг келишувларини узайтиришни режалаштирмаяпти. Шу тариқа Томори ва Лофтус-Чик мавсум якунида эркин агентга айланиши мумкин.
Қайд этилишича, ушбу икки футболчи билан хайрлашиш «Милан»га маошлар учун йилига қарийб 10 млн еврони тежаш имконини беради. Клуб молиявий харажатларни камайтириш ва таркибдаги ўзгаришларни давом эттиришни кўзламоқда.
Манба Томорининг январ ойидаёқ жамоани тарк этиши мумкинлигини ҳам истисно қилмаган. Лофтус-Чик эса катта эҳтимол билан шартномаси якунлангунига қадар «Милан» сафида қолади.
Маълумот учун, «Милан» Италия чемпионатининг беш туридан сўнг 11 очко жамғариб, турнир жадвалининг бешинчи поғонасида бормоқда.
