«Барселона»нинг чап қанот ҳимоячиси Алехандро Балде қишки трансфер ойнасидаёқ Англияга кўчиб ўтиши мумкин. Бу ҳақда инсайдер Экрем Конур хабар берди.
Манбага кўра, испаниялик 22 ёшли футболчининг вакиллари эҳтимолий трансфер масаласида «Фулҳэм» билан музокара ўтказган.
Балденинг хизматлари шунингдек «Эвертон» ва «Сандерленд»га ҳам таклиф қилинган. Премер-лиганинг икки гранд клуби — «Манчестер Юнайтед» ва «Ливерпул» ҳам футболчига даъвогарлар қаторида.
Бироқ инглиз клублари футболчи борасида аниқ бир таклиф билан мурожаат қилмаган.
Алехандро «Барселона»даги асосий таркибдаги ўрнини йўқотгани сабабли, каталонияликлар футболчини ижарага беришга тайёр.
Transfermarkt портали футболчининг трансфер қийматини 50 миллион еврога баҳоламоқда. Футболчининг «Барселона» билан амалдаги шартномаси 2028 йилнинг ёзигача мўлжалланган.
