Германия миллий жамоаси футболчиси Кай Ҳаверц 2026 йилги жаҳон чемпионати 1/16 финал босқичидаги Парагвайга қарши баҳс (1:1, пен.сер 3:4)дан сўнг ўз фикрлари билан ўртоқлашди.
«Бу ҳақда нима дейиш мумкин? Бу менинг иккинчи жаҳон чемпионатим ва биз иккинчи марта кетма-кет кейинги босқичга чиқа олмадик. Бунинг учун узр сўрамоқчиман.
Барчамиз жуда хафамиз, чунки бу жаҳон чемпионати учун режаларимиз катта эди. Яна мухлисларнинг умидини оқлай олмаганимиз жуда оғир. Жамоа бор кучини ишга солди.
Бизнинг битта голимиз бекор қилинди. Рақиб жуда кучли эди, вазиятлар яратиш ва ўйин суръатини ушлаб туриш қийин кечди. Парагвай ҳимояда жуда чуқур жойлашди, бу эса узоқ вақт юқори темпда ўйнашни қийинлаштирди.
Биз ўйинни қанотларга кўчиришга ҳаракат қилдик, аммо, афсуски, бу кутилган самарани бермади. Менимча, бу сафар ғалабага лойиқ эмасдик.
Рақибга кўп имконият бердик деб ўйламайман. Биз тўпни назорат қилдик, айниқса ҳисобни тенглаштирганимиздан кейин ўзимизга бўлган ишонч ортганди. Барчаси пеналтилар сериясига бориб тақалди. Мен зарбамни аниқ ижро эта олмаганим учун бу осон бўлмади. Бу ерда имкониятлар 50 га 50 эди.
Жаҳон чемпионатида ҳар бир ўйинга ўзингни тўлиқ қурбон қилишинг керак. Менимча, биз ёмон футбол кўрсатмадик, аммо ҳар сафар нимадир етишмади.
Бугун ҳам худди шу ҳолат такрорланди. Биз футболчилар сифатида ўзимизга танқидий назар ташлаб, нимани яхшилашимиз мумкинлигини англаб олишимиз керак.
Биз буюк футбол мамлакати шарафини ҳимоя қиламиз. Агар мусобақани эрта тарк этсанг, демак, унда қолишга лойиқ бўлмагансан», — деди «Арсенал» футболчиси.
