«Лилл» бош мураббийи Давиде Анчелотти 18 ёшли яримҳимоячи Аюб Буадди трансфери бўйича музокаралар кетаётганини тасдиқлади. Аввалроқ Тҳе Телеграпҳ «Манчестер Сити» футболчи трансфери устида ишлаётганини хабар қилганди.
«Лилл» футболчини сотишни истамаяпти ва унинг трансфери учун камида 85 миллион фунт, яъни қарийб 100 миллион евро талаб қилмоқда. Аввалроқ Буадди «Манчестер Сити» билан шахсий шартнома шартларини келишиб олгани ҳақида хабарлар тарқалганди.
«Албатта, музокаралар кетмоқда. Унга кўплаб клублардан қизиқиш бор. У жуда, жуда яхши футболчи ва унинг биз билан қолишига умид қиламан.
Уни ўзига хос қиладиган жиҳат нима? Унда жуда кучли характер бор. У майдонда ҳам, ундан ташқарида ҳам ниҳоятда ақлли, жуда етук. У 18 ёшда, аммо майдонда худди 32 ёшли футболчидек кўринади.
Техник жиҳатдан у жуда универсал. Жисмонан ҳам кучли ва яккакурашларда жуда яхши. Келаси ўн йил ичида у Европанинг энг яхши яримҳимоячиларидан бирига айланади», — деди Анчелотти.
Маълумот учун, Буадди ўтган мавсум Лига 1да 30 та баҳсда майдонга тушиб, 7 та сариқ ва 1 та қизил карточка олди.
