Александр Хомяков: «Менимча, 1:1 адолатли натижа»

Суперлиганинг 19-тури давом эттирилди. Қўқонда «Қўқон-1912» жамоаси «Бухоро»ни қабул қилди. Меҳмонлар ютқазаётган пайтда қўшимча дақиқада гол уриб дурангга эришиб қолди.

Учрашувдан кейинги матбуот анжуманида бухороликлар бош мураббийи Александр Хомяков матбуот анжуманида қатнашди.

— Менимча, футболни тушунадиганлар бугунги каби ўйинда дуранг натижа қайд этишни муваффақиятли натижа, деб ҳисоблашади. Шунинг учун йигитларга катта раҳмат айтмоқчиман. Улар қўлни тушириб қўйишмади, охиригача ўйинни давом эттиришди. Менимча, 1:1 — адолатли натижа.

- Ўйин пайтида ҳакамларни қарорида кўп бор норози бўлдингиз ва сариқ карточка ҳам олдингиз. Ҳакамлик хусусида нима дея оласиз?

- Ҳакамлик ҳақида нима дейишим мумкин? Менга ҳам сариқ карточка беришди. Умуман, бугун кўпчиликка сариқ карточка берилди. Агар хоҳлашса, қизил карточка ҳам беришлари мумкин эди. Билмадим, албатта, буни мутахассислар яхшироқ, холисроқ баҳолаб беришади.
Бошқа томондан қараганда, футболчи майдон марказида ўйнаяпти, унинг атрофида яна уч нафар ҳимоячи бор. У қаёққа қочиши керак? Қаёққа қочади? «Ҳужумни узди», дейишяпти. Қандай ҳужумни узди? Нима учун ҳужумни узди? Балки, қоидаларни талқин қилиш ўзгаргандир. Ҳар сафар қандайдир янгилик пайдо бўлади.

Ҳозир футбол шундай бўлиб қолдики, ҳужумчига ўйнаш жуда осонлашиб кетди. Унга ҳимоячидан узилиш ҳам шарт эмас. Шунчаки ҳимоячининг тирсагини топиб, йиқилиши кифоя. Тамом. Ҳозир футбол балетга тобора яқинлашиб бормоқда.
Шунинг учун айтаман: менинг назаримда, ҳужумчиларга ўйнаш тобора осонлашяпти. У ерда туриб курашиш, жисмоний жиҳатдан олишиш шарт эмас. Истаган томонга югуриш мумкин, асосийси — вақтида бирор жойга ўзингизни ташлаб, йиқилиш.

Шунинг учун бугунги ўйин ҳақида яна бир бор айтаман: учрашув вазиятларга бой ёки жуда томошабоп бўлди, деб айта олмайман. Катта ҳисобда битта-иккита хатонинг ўзи натижани ҳал қилди. Шунинг учун шундай натижа қайд этилди. Ҳар икки жамоа ҳам ҳаракат қилди, менинг йигитларим ҳам ўзларини яхши кўрсатишди. Шу боис 1:1 — умуман олганда, адолатли натижа.

- Жамоангизни совринли ўринлар учун курашашини айтгандингиз. Бу борадаги имкониятни қандай баҳолайсиз?

— Мен «совринли ўринлар учун курашамиз», деб айтганимни эслай олмаяпман. Мен фақат ҳозирча шу ўринда эканимизни ва шу позицияни сақлаб қолиш учун бор кучимиз билан ҳаракат қилишимизни айтганман. «Биз аниқ совринли ўринлар учун курашамиз», деган гапни айтмаганман. Балки, нотўғри таржима қилинган ёки сиз нотўғри тушунгансиз. Бундай ўйин билан бу жуда қийин. Сиз ўзингиз ҳам кўриб турибсиз: бу ерда сифатли футбол намойиш этиш осон эмас. Шунинг учун ўйинлар ҳам анча кескин ва жиддий характер касб этади.

Нима учун бундай эканини биласизми? Агар футболни яхши тушунсангиз, бу ерда сифатли футбол кўрсатиш қанчалик қийинлигини биласиз. Шу сабабли ўйинлар жуда кескин ўтади ва натижа кўпинча битта хато эвазига ҳал бўлади. Биз ҳам айнан шундай бўлишини олдиндан яхши тахмин қилгандик. Ўйин осон бўлмаслигини билардик. Ҳозирча юқори ўринларда эканимизга келсак, мен айтганман: шу позицияда илиниб қолиш, уни сақлаб қолиш учун бор кучимиз билан ҳаракат қиламиз. Ҳозирча шукрки, бунинг уддасидан чиқяпмиз.

- Майдон сифати борасида нима дея оласиз?

- Агар жамоаларга бу майдонда ўйнашга рухсат берилаётган бўлса, демак, тегишли мутасаддилар мендан кўра кўпроқ тушунишади ва ўйинларни шу майдонда ўтказишга қарор қилишган.
Майдон ҳамма учун бир хил. Агар ҳозир «майдон бизга халақит берди», деган гаплар бўлаётган бўлса — йўқ. Майдон рақиб учун ҳам қандай бўлган бўлса, биз учун ҳам шундай эди. Шунинг учун бу ерда ҳеч қандай фожиа йўқ. Бунга ҳеч нарса қила олмайсиз. Одатда ҳам август ойида майдонлар анча қийналиб қолади», - дея Хомяковнинг сўзларини келтиради Tribuna.uz журналисти.