Карим Бенземанинг «Ал Ҳилол» билан шартномаси бекор қилиниши мумкин. Саудия клуби янги топ-даражадаги ҳужумчини харид қилиш учун франциялик футболчи билан хайрлашишга тайёр. Бу ҳақда indykaila News хабар берди.
Манбага кўра, «Ал Ҳилол» Бензема билан ўзаро келишув асосида шартномани бекор қилиш вариантини кўриб чиқмоқда. Бунинг учун клуб аввал бошқа кучли ҳужумчини таркибига қўшиб олиши керак.
Бундай қарорнинг сабабларидан бири «Галатасарой» ҳужумчиси Виктор Осимхенга бўлган қизиқиш экани айтилмоқда.
Маълумот учун, Бензема 2026 йил февралида «Ал Иттиҳод»ни тарк этиб, «Ал Ҳилол»га расман ўтганди. 38 ёшли футболчи профессионал фаолиятини «Лион»да бошлаган, 2009 йилда эса «Реал»га кўчиб ўтган. Мадрид клуби сафида 14 мавсум давомида 25 та соврин, жумладан, 5 та Чемпионлар Лигаси кубогини қўлга киритган.
Эслатиб ўтамиз, 2022 йилда Бензема «Олтин тўп» соҳибига айланган. 2023 йил ёзида «Реал»ни тарк этиб, «Ал Иттиҳод»га ўтган ва Саудия клуби билан мамлакат чемпионлиги ҳамда Кубогини қўлга киритган.
