«Bavariya» yarimhimoyachisi Aleksandr Pavlovich yozgi transfer oynasida «Manchester Siti»ga o‘tishdan bosh tortdi. Bu ma’lumotni taniqli jurnalist Florian Plettenberg BILD FC Bayern nashriga tayanib e’lon qildi.
Manbaning xabar berishicha, «shaharliklar» mart oyidayoq «Bavariya» va Pavlovich bilan aloqa o‘rnata boshlagan. Ingliz grandi nemislarga 22 yoshli yarimhimoyachi uchun 100 million yevrogacha to‘lashga tayyorligini bildirgan. Pavlovichning o‘zi bu qiziqishni ijobiy qabul qildi va hatto taklif haqida o‘ylab ko‘rdi, ammo oxir-oqibat rad javobini berdi, shuning uchun ish «Bavariya»ga yuboriladigan rasmiy taklifgacha yetib bormagan.
Ma’lumot uchun, Pavlovich yangi mavsumda barcha musobaqalarni inobatga olganda, yettita o‘yinda maydonga tushib, bitta gol urdi va ikkita golli uzatma yetkazib berdi.
