Boks bo‘yicha og‘ir vazn toifasida sobiq jahon chempioni Tayson Fyuri 2015 yilda Vladimir Klichko ustidan qozongan g‘alabasidan keyin nimalarni his qilganini aytib berdi.
«Men bolaligimda Klichko allaqachon chempion edi va men doim: «Bir kuni bu yigitni mag‘lub etaman», derdim. O‘shanda hamma ustimdan kulardi.
U 11 yil davomida chempion bo‘ldi. Men unga qarshi chempionlik jangida ishtirok etish uchun 3 yil kutdim, chunki meni doim chetga surishardi.
Nihoyat chempionlik jangiga erishganimda, bu men uchun Everest cho‘qqisidek edi. Keyin aytganimdek, g‘alaba qozondim va shundan so‘ng hammasi tugadi.
Bolaligimdan istagan barcha narsamga erishdim. Bu aqlbovar qilmas darajada ajoyib bo‘ladi deb o‘ylagandim, ammo oradan bir daqiqa o‘tar-o‘tmas hammasi barbod bo‘ldi.
Ringdan chiqib, kiyinish xonasiga kirganimdan so‘ng depressiyaga tushdim, chunki hayotimda endi hech narsa qolmagandek edi.
Yashashimning asosiy sababi — Klichkoni mag‘lub etish edi va bu bir zumda yo‘qoldi. Shundan keyin hammasi pastga qarab ketdi: doimiy depressiya.
Og‘ir vaznda jahon chempioni sifatida hamma narsaga ega edim, ammo baribir depressiyada edim. Har kuni o‘lishni xohlardim.
Hech kim menga yordam bera olmadi. Keyin bir kuni shunday voqea yuz berdiki, men tiz cho‘kib, Xudoga duo qildim. Yotoqxonada polga yotib, yig‘ladim.
Vaznim 400 funtga (181 kg) yetgan, boksdan deyarli uch yil chetda qolgan edim. Xudoga: «Men endi o‘zim buni uddalay olmayapman. Menga yordam berishing kerak. Meni yana boksga qaytar», dedim.
Men polda abadiy yotgandek edim, garchi aslida 10 daqiqa o‘tgan bo‘lsa ham. Lekin o‘rnimdan turganimda, go‘yo dunyodagi barcha og‘irlik yelkamdan olib tashlangandek his qildim.
Keyin rafiqam Perisga baqirdim: «Ertaga formamni tiklash missiyasini boshlaymiz», — dedi Fyuri.
Eslatib o‘tamiz, Fyuri 2015 yil noyabr oyida Klichkoni hakamlarning yakdil qarori bilan mag‘lub etgan. Shundan so‘ng u qariyb uch yil davomida jang o‘tkazmagan.
