«Arsenal» jamoa yetakchilari — yarim himoyachilar Deklan Rays, Martin Edegor va himoyachi Yurriyen Timber bilan shartnomalarni uzaytirish bo‘yicha faol muzokaralar olib bormoqda. Bu haqda TEAMtalk nashri xabar berdi.
Manba ma’lumotlariga ko‘ra, «to‘pchilar» bir necha oydan buyon uch futbolchi bilan yangi bitimlar borasida muloqot qilmoqda. Hozircha shartnomalar imzolanmagan, biroq klub rahbariyati ushbu masalani noyabr oyidagi xalqaro tanaffus davrida hal qilishga umid qilmoqda.
Qayd etilishicha, tomonlar kelishuvga erishish uchun faqat yakuniy tafsilotlarni kelishib olishi kerak. O‘z navbatida, Rays, Edegor va Timber jamoada uzoq vaqt qolishga qaror qilgan.
Eslatib o‘tamiz, Mikel Arteta jamoasi Angliya Premyer-ligasining oltita turidan keyin 15 ochko bilan turnir jadvalining ikkinchi pog‘onasidan joy olgan.
