“Andijon” Mahmud Mahamadjonovni RPL klubiga sotganini eʼlon qildi

“Andijon”ning 23 yoshli qanot himoyachisi Mahmud Mahamadjonov Rossiya Premyer-ligasi ishtirokchisi — Maxachqalaning “Dinamo” klubiga transfer qilindi. Bu haqda “burgutlar” matbuot xizmati xabar berdi.

Futbolchining transfer qiymati 250 ming dollarga baholandi.

“Mahmud Mahamadjonov jamoamiz safiga joriy yil boshida qoʻshilgandi. U «Andijon” tarkibida Superligada 19 ta uchrashuvda maydonga tushib, 1 ta golli uzatma amalga oshirdi. Oʻzbekiston Kubogi bahslarida esa 3 ta uchrashuvda ishtirok etib, 2 ta golga assistentlik qildi va muxlislar qalbidan joy egalladi. Umumiy hisobda, “burgutlar” safida oʻtgan vaqt davomida barcha – 22 ta uchrashuvda maydonga tushdi.

Mahmud Mahamadjonovga jamoamiz safidagi faoliyati uchun minnatdorlik bildiramiz va Rossiya Premyer-ligasidagi yangi faoliyatida omad va muvaffaqiyat tilaymiz!

Mahmud, hammasi uchun rahmat!» — deb yozadi “Andijon” matbuot xizmati.

Maʼlumot uchun, “Dinamo” RPLda 6 oʻyinda 9 ochko toʻplab, 7-oʻrinni egallab turibdi.