«Андижон» Маҳмуд Маҳамаджоновни РПЛ клубига сотганини эълон қилди

«Андижон»нинг 23 ёшли қанот ҳимоячиси Маҳмуд Маҳамаджонов Россия Премер-лигаси иштирокчиси — Махачқаланинг «Динамо» клубига трансфер қилинди. Бу ҳақда «бургутлар» матбуот хизмати хабар берди.

Футболчининг трансфер қиймати 250 минг долларга баҳоланди.

«Маҳмуд Маҳамаджонов жамоамиз сафига жорий йил бошида қўшилганди. У «Андижон» таркибида Суперлигада 19 та учрашувда майдонга тушиб, 1 та голли узатма амалга оширди. Ўзбекистон Кубоги баҳсларида эса 3 та учрашувда иштирок этиб, 2 та голга ассистентлик қилди ва мухлислар қалбидан жой эгаллади. Умумий ҳисобда, «бургутлар» сафида ўтган вақт давомида барча – 22 та учрашувда майдонга тушди.

Маҳмуд Маҳамаджоновга жамоамиз сафидаги фаолияти учун миннатдорлик билдирамиз ва Россия Премер-лигасидаги янги фаолиятида омад ва муваффақият тилаймиз!

Маҳмуд, ҳаммаси учун раҳмат!» — деб ёзади «Андижон» матбуот хизмати.

Маълумот учун, «Динамо» РПЛда 6 ўйинда 9 очко тўплаб, 7-ўринни эгаллаб турибди.