«Ювентус» келаси йил давомида жамоа таркибини кенг кўламда қайта қуришни режалаштирмоқда. Бу ҳақда Тuttosport хабар берди.
Манбага кўра, дарвозабонлар орасида туринликлар «Ливерпул» вакили Алиссон Беккерга қизиқиш билдирмоқда. Бразилиялик футболчининг инглиз клуби билан шартномаси 2027 йил ёзида якунига етади.
Ҳимоя чизиғини кучайтириш учун «Удинезе» ҳимоячиси Умар Соле, «Лейпциг» футболчиси Давид Раум ва «Кристал Пэлас» вакили Тайрик Митчелл номзодлари кўриб чиқилмоқда. «Ювентус» бир нечта позицияларни кучайтириш орқали таркибни янгиламоқчи.
Яримҳимоя учун эса «Наполи» футболчиси Станислав Лоботка асосий номзодлардан бири сифатида қайд этилган. Бош мураббий Лучано Спаллетти словакиялик яримҳимоячини жамоага олиб келишни истамоқда. Шунингдек, «Манчестер Сити» яримҳимоячиси Матео Ковачичнинг трансфери ҳам эҳтимолий вариант сифатида кўриб чиқилмоқда.
Ҳужум чизиғида Мадриднинг «Реал» клубидан Браим Диасга қизиқиш бор. Бундан ташқари, «Кристал Пэлас» ҳужумчиси Жан-Филип Матета ҳам Турин клуби радарида қолмоқда. «Ювентус» ёзги трансфер ойнасида футболчининг жисмоний ҳолати сабаб унинг трансферидан воз кечганди.
Манбага кўра, Матета қишда бошқа клублар билан дастлабки келишувларни имзолаш ҳуқуқига эга бўлади. Шу сабабли франциялик ҳужумчининг трансфери бўйича вазият қишда ўзгариши мумкин.
